కంబదూర్ వైఎస్ఆర్ సీపీ ఆధ్వర్యంలో రోడ్ షో.

కంబదూరు: స్థానిక సంస్థల ఎన్నికల నేపథ్యంలో వైఎస్సార్ కాంగ్రెస్ పార్టీ నాయకుల ఆధ్వర్యంలో మంగళవారం కంబదూరు మండల కేంద్రంలో భారీ రోడ్‌షో నిర్వహించారు. చెక్‌పోస్టు సర్కిల్ నుంచి ప్రారంభమైన ర్యాలీ పాత పోస్టాఫీస్, పాత బస్టాండ్, ఎన్టీఆర్ సర్కిల్ మీదుగా అంబేద్కర్ సర్కిల్ వరకు కొనసాగింది. ఈ కార్యక్రమానికి ముఖ్య అతిథిగా తలారి సాయి హర్ష హాజరయ్యారు. రోడ్‌షోలో పార్టీ నాయకులు, కార్యకర్తలు పెద్ద సంఖ్యలో పాల్గొని పార్టీ జెండాలు, నినాదాలతో సందడి చేశారు. ఈ సందర్భంగా వైఎస్సార్‌సీపీ మండల జడ్పీటీసీ అభ్యర్థి నూతిమడుగు అరుణ, ఎంపీటీసీ అభ్యర్థులు శకుంతలమ్మ, అమృత, దాదు, గాజుల రామాంజనేయులు ఓటర్లను కలుసుకుని తమకు మద్దతు ఇవ్వాలని కోరారు. రానున్న ఎన్నికల్లో ఫ్యాన్ గుర్తుపై ఓటు వేసి పార్టీ అభ్యర్థులను గెలిపించాలని విజ్ఞప్తి చేశారు. గ్రామీణ ప్రాంతాల అభివృద్ధి, ప్రజా సమస్యల పరిష్కారానికి తమ అభ్యర్థులకు అవకాశం కల్పించాలని నాయకులు ఓటర్లను అభ్యర్థించారు. మండల కేంద్రంలోని ప్రధాన వీధుల గుండా సాగిన రోడ్‌షోతో ఎన్నికల ప్రచార వాతావరణం నెలకొంది. ఈ కార్యక్రమంలో వైఎస్సార్‌సీపీ నాయకులు, కార్యకర్తలు, అభిమానులు తదితరులు పాల్గొన్నారు.
కళ్యాణదుర్గం టౌన్ రిపోర్టర్ :- బోయ రంగస్వామి.