కలెక్టర్‌కు తృటిలో తప్పిన పెను ప్రమాదం.... *మూడు చెక్‌పోస్టుల మీదుగా డ్రైవర్‌ను వెంటాడిన సిబ్బంది *
విజయనగరం బ్యూరో, సూర్య : నిన్నటి వరకు విజయనగరం ఇలవేల్పు పైడితల్లి అమ్మవారి సిరిమానోత్సవ నిర్వహణ... మరోవైపు ముంచుకొస్తున్న అర్నాబ్ తుఫాను.....ఇంకోవైపు స్థానిక ఎన్నికల హడావుడి..... ఇలా మూడు కీలక బాధ్యతల తో విశ్రాంతి లేకుండా క్షేత్రస్థాయిలో తిరుగుతున్న జిల్లా కలెక్టర్ ఎస్. రామ్‌సుందర్ రెడ్డికి బుధవారం తిరుగు ప్రయాణంలో తృటిలో పెను ప్రమాదం తప్పింది. క్షణాల్లో జరిగిన ఈ ఘటనలో అదృష్టవశాత్తు ఎవరికీ ఎలాంటి గాయాలు కాలేదు. తుఫాను ప్రభావంతో పెద్దగడ్డ నదిలో నీటి ప్రవాహం ఉధృతంగా ఉండటంతో కలెక్టర్ పారాది వంతెన వద్ద పరిస్థితిని పరిశీలించారు. అనంతరం బొబ్బిలి మున్సిపల్ కార్యాలయంలో ఎన్నికల సిబ్బంది ఓటు హక్కు వినియోగించుకునేందుకు ఏర్పాటు చేసిన ఫెసిలిటేషన్ కేంద్రాన్ని తనిఖీ చేశారు. పనులు ముగించుకుని విజయనగరం వస్తుండగా భూషాయవలస పెట్రోల్ బంక్ సమీపంలో బంక్ వైపు నుంచి ఎదురుగా దూసుకొచ్చిన లారీ కలెక్టర్ కారును ఢీకొట్టింది. ఈ ధాటికి కారు ఎడమవైపు భాగం పూర్తిగా నుజ్జయింది. కారులో కలెక్టర్‌తో పాటు డ్రైవర్ కృష్ణ, సీసీ దుర్గాప్రసాద్, గన్‌మెన్ రాము, దఫేదార్ రమేష్, సమాచార శాఖ వీడియోగ్రాఫర్ సన్యాసినాయుడు ఉన్నారు. అందరూ సురక్షితంగా బయటపడటంతో అధికార యంత్రాంగం ఊపిరి పీల్చుకుంది.
సినిమా తరహా ఛేజింగ్
ప్రమాదం జరిగిన వెంటనే లారీ డ్రైవర్ వాహనాన్ని ఆపకుండా పరారయ్యాడు. అప్రమత్తమైన సిబ్బంది అతడిని వెంబడించారు. రామభద్రపురం, కొట్టక్కి చెక్‌పోస్టుల వద్ద కూడా ఆగకుండా దూసుకెళ్లిన డ్రైవర్, చివరకు పీకోనవలస చెక్‌పోస్టు సమీపంలో లారీని వదిలేసి పారిపోయాడు. పోలీసులు లారీని స్వాధీనం చేసుకున్నారు. డ్రైవర్ మద్యం సేవించి వాహనం నడిపినట్లు ప్రాథమికంగా గుర్తించినట్లు సమాచారం.
రిపోర్టర్ : డేవిడ్ రాజు, విజయనగరం.
