కడియంలో 71.57శాతం పోలింగ్ నమోదు

కడియం, మేజర్ న్యూస్ ,:కడియం మండలంలో స్థానిక సంస్థల ఎన్నికల పోలింగ్ ప్రక్రియ ప్రశాంత వాతావరణంలో ముగిసింది. ఉదయం నుంచే ఓటర్లు పోలింగ్ కేంద్రాలకు తరలివచ్చి తమ ఓటు హక్కును వినియోగించుకున్నారు. మండలవ్యాప్తంగా మొత్తం 71.57 శాతం పోలింగ్ నమోదైంది.
మండలంలో మొత్తం 62,081 మంది ఓటర్లు ఉండగా, వారిలో 44,436 మంది తమ ఓటు హక్కును వినియోగించుకున్నారు. మొత్తం 78 పోలింగ్ కేంద్రాల్లో ఎన్నికల అధికారులు ఓటింగ్ ప్రక్రియను నిర్వహించారు.ఓటు హక్కు వినియోగించుకున్న ప్రధాన అభ్యర్థులు ఎన్నికల బరిలో నిలిచిన ప్రధాన పార్టీల అభ్యర్థులు సైతం తమ ఓటు హక్కును వినియోగించుకున్నారు. బుర్రిలంకలో కూటమి జడ్పీటీసీ అభ్యర్థి రత్నం మహేశ్వరి దేవి, వైకాపా జడ్పీటీసీ అభ్యర్థి కొత్తపల్లి నాగ శివాజీ ఓటు వేశారు. అదే గ్రామంలో వైకాపా ఎంపీపీ అభ్యర్థి తాడాల రాజరాజేశ్వరి ఓటు హక్కును వినియోగించుకున్నారు. కడియపులంకలో కూటమి ఎంపీపీ అభ్యర్థి బోడపాటి మోహిని వీర పుణ్యవతి ఓటు వేశారు. పలువురు ప్రజాప్రతినిధులు, రాజకీయ ప్రముఖులు కూడా తమ ఓటు హక్కును వినియోగించుకున్నారు.
మండలంలోని మాధవరాయుడుపాలెంలో స్వల్ప ఘర్షణ చోటుచేసుకోవడంతో కొద్దిసేపు ఉద్రిక్త పరిస్థితులు నెలకొన్నాయి. పోలీసులు వెంటనే స్పందించి పరిస్థితిని అదుపులోకి తీసుకువచ్చారు. ఈ ఘటన మినహా మిగిలిన అన్ని గ్రామాల్లో పోలింగ్ ప్రశాంతంగా సాగింది. ఎన్నికల అధికారులు, పోలీసు సిబ్బంది నిరంతరం పర్యవేక్షిస్తూ ఎలాంటి అవాంఛనీయ సంఘటనలు చోటుచేసుకోకుండా చర్యలు చేపట్టారు.