జిల్లా వ్యాప్తంగా ఆపరేషన్ త్రిశూల్ -బీఎన్ కండ్రిగలో పోలీసులు కార్డన్ సెర్చ్ -పత్రాలు లేని 7 ద్విచక్ర వాహనాలు స్వాధీనం

జిల్లాలో నేర నియంత్రణకు తిరుపతి జిల్లా పోలీసులు చేపట్టిన 'ఆపరేషన్ త్రిశూల్' లో భాగంగా బీఎన్ కండ్రిగ పోలీస్ స్టేషన్ పరిధిలోని ఎన్టీఆర్ నగర్‌లో ఆదివారం ఉదయం పోలీసులు విస్తృతంగా కార్డన్ & సెర్చ్ నిర్వహించారు.జిల్లా ఎస్పీ ఎల్.సుబ్బరాయుడు ఆదేశాల మేరకు శ్రీకాళహస్తి సబ్ డివిజన్ పోలీసుల ఆధ్వర్యంలో ఈ తనిఖీలు జరిగాయి. పోలీసు బృందాలు ఎన్టీఆర్ నగర్ ప్రాంతాన్ని చుట్టుముట్టి అనుమానాస్పద వ్యక్తులు, వాహనాలను తనిఖీ చేశారు. ఈ సందర్భంగా 43 ద్విచక్ర వాహనాలను పరిశీలించగా, ఎలాంటి పత్రాలు లేని 7 వాహనాలను గుర్తించి బీఎన్ కండ్రిగ పోలీస్ స్టేషన్‌కు తరలించారు. వాటి యాజమాన్య వివరాలపై ఆరా తీస్తున్నారు. అదేవిధంగా స్థానిక ప్రజలకు మహిళల భద్రత, మాదకద్రవ్యాల నిర్మూలన, రోడ్డు భద్రతపై అవగాహన కల్పించారు. వాహనదారులు ఆర్సీ, డ్రైవింగ్ లైసెన్స్, ఇన్సూరెన్స్ పత్రాలు తప్పనిసరిగా కలిగి ఉండాలని, రికార్డులు లేని వాహనాలను కొనుగోలు చేయవద్దని సూచించారు. అనుమానాస్పద కార్యకలాపాలు గుర్తిస్తే డయల్ 112కు సమాచారం ఇవ్వాలని కోరారు.

సీఎం గౌడ్ తిరుపతి ప్రతినిధి