జనగణనలో ప్రతి కులానికి ప్రత్యేక కోడ్ ఇచ్చి శాస్త్రీయంగా లెక్కించాలి వచ్చే పార్లమెంట్ సమావేశంలోనే రాజ్యాంగ సవరణ చేసి బీసీలకు ప్రమోషన్లలో రిజర్వేషన్ కల్పించాలి-- సంచారజాతుల సంఘం రాష్ట్ర అధ్యక్షులు పూసల రవి డిమాండ్
పలమనేరు మేజర్ న్యూస్ కేంద్ర ప్రభుత్వం చేపట్టబోతున్న జనగణనలో కులగణన చేపట్టేందుకు ముందుకు రావడాన్ని మేము హృదయపూర్వకంగా స్వాగతిస్తున్నాం. ఇది చాలా ఆలస్యంగా తీసుకున్న నిర్ణయమైనా, సరైన దిశలో వేసిన అడుగు.కానీ కేవలం కులగణన అంటే సరిపోదు. అది శాస్త్రీయంగా, పారదర్శకంగా, ఎలాంటి లోపాలు లేకుండా జరగాలి. అందుకోసం కేంద్ర, రాష్ట్ర ప్రభుత్వాలను మేము గట్టిగా కోరుతున్నది ఒక్కటే…
ప్రతి కులానికి ప్రత్యేక కోడ్ ఇవ్వాలి.ఒక్కో కులానికి ఒక్కో కోడ్ నంబర్ కేటాయించి, ఆ కోడ్ ప్రకారమే జనాభా లెక్కించాలి. అప్పుడే ఏ కులం ఎంత ఉందో, ఏ కులం సామాజికంగా, ఆర్థికంగా, విద్యాపరంగా ఎంత వెనుకబడి ఉందో ఖచ్చితమైన లెక్కలు బయటకు వస్తాయి. కోడ్ లేకుండా చేసే లెక్కింపు వల్ల బీసీలు, సంచారజాతులు, అత్యంత వెనుకబడిన వర్గాలు మళ్లీ నష్టపోతాయి. మా జనాభాను తక్కువ చేసి చూపించే కుట్రలకు ఇక తావు ఉండకూడదు.దేశంలో అత్యధిక జనాభా కలిగిన వర్గం బీసీలే. అయినా నేటికీ ఉద్యోగాల్లో, ముఖ్యంగా పదోన్నతుల్లో బీసీలకు న్యాయం జరగడం లేదు. ఎస్సీ, ఎస్టీలకు ప్రమోషన్లలో రిజర్వేషన్ ఉన్నట్లే, బీసీలకు కూడా ప్రమోషన్లలో రిజర్వేషన్ కల్పించాలని ఇప్పటికే పలు కమిషన్లు సిఫార్సు చేశాయి.పదోన్నతుల్లో బీసీలకు రిజర్వేషన్ కల్పించేందుకు చట్టపరంగా, రాజ్యాంగపరంగా, న్యాయపరంగా ఎలాంటి అవరోధాలు లేవు. కావాల్సింది కేవలం కేంద్ర ప్రభుత్వానికి చిత్తశుద్ధి, రాజకీయ సంకల్పం మాత్రమే.కాబట్టి రాబోయే పార్లమెంట్ సమావేశంలోనే రాజ్యాంగ సవరణ చేపట్టి, బీసీలకు పదోన్నతుల్లో రిజర్వేషన్ కల్పించే చట్టాన్ని తీసుకురావాలని కేంద్ర ప్రభుత్వాన్ని మేము డిమాండ్ చేస్తున్నాం.ఇది కేవలం సంచారజాతుల డిమాండ్ కాదు. కోట్లాది మంది బీసీల ఆత్మగౌరవానికి సంబంధించిన డిమాండ్. మా జనాభాకు తగిన వాటా, మా హక్కులు మాకు కావాలి.కులగణనలో కోడ్ విధానం అమలు చేయకపోతే, ప్రమోషన్లలో రిజర్వేషన్ అమలు చేయకపోతే, బీసీలు, సంచారజాతులు ఊరుకోవు. రాష్ట్రవ్యాప్తంగా, దేశవ్యాప్తంగా పెద్ద ఎత్తున ఉద్యమాన్ని నిర్మిస్తాం. కేంద్ర, రాష్ట్ర ప్రభుత్వాలు ఈ విషయాన్ని సీరియస్ గా తీసుకోవాలి.
రిపోర్టర్ అనిల్ కుమార్ యాదవ్