జడ్పీ టీచర్ల పీఎఫ్ లను జీపీఎఫ్ గా మార్చాలి!

ఉపాధ్యాయ సంఘాల విజ్ఞప్తి పై స్పందించిన ఎమ్మెల్సీ...

డిప్యూటీ సీఎం పవన్ కళ్యాణ్ కు ఎమ్మెల్సీ గాదె శ్రీనివాసులు నాయుడు లేఖ

ఎస్.రాయవరం, రాష్ట్రంలో జిల్లా పరిషత్ యాజమాన్యంలో పనిచేస్తున్న ఉపాధ్యాయుల పీఎఫ్ ఖాతాలను జీపీఎఫ్ ఖాతాలుగా మార్చాలని కోరుతూ ఉత్తరాంధ్ర ఉపాధ్యాయ ఎమ్మెల్సీ డాక్టర్ గాదె శ్రీనివాసులు నాయుడు రాష్ట్ర ఉప ముఖ్యమంత్రి కొణిదెల పవన్ కళ్యాణ్ కి లేఖ రాశారు. ఉపాధ్యాయ సంఘాల విజ్ఞప్తి కి ఎమ్మెల్సీ గాదె తక్షణమే స్పందించి ఈ లేఖ రాశారు. రాష్ట్రంలో జడ్పీ టీచర్ల నియామకాలు, జీతాల చెల్లింపు జిల్లా విద్యాశాఖ అధికారి వారి ఆధ్వర్యంలో జరుగుతున్నాయని, అలాగే ఉపాధ్యాయుల సర్వీస్ మేటర్స్ అన్నీ విద్యాశాఖ ఆధ్వర్యంలోనే నిర్వహించబడుతున్నాయని ఆ లేఖలో ఎమ్మెల్సీ స్పష్టంగా పేర్కొన్నారు. అయినప్పటికీ పీఎఫ్ అకౌంట్లు మాత్రం ఇంకా జిల్లా పరిషత్ యాజమాన్యంలోనే కొనసాగుతున్నాయని, వాటిని వెంటనే జీపీఎఫ్ లుగా మార్చాలని విజ్ఞప్తి చేశారు. కొత్త జిల్లాలు ఏర్పడిన నేపథ్యంలో, కొత్త జడ్పీలకు పీఎఫ్ ఖాతాలను బదలాయించకుండా, పాత జిల్లాలు మరియు కొత్త జిల్లాలను కలిపి జీపీఎఫ్ లుగా మార్చి ప్రభుత్వానికి అప్పగించాలని ఎమ్మెల్సీ గాదె శ్రీనివాసుల నాయుడు తన లేఖలో ఉప ముఖ్యమంత్రి పవన్ కళ్యాణ్ ను కోరారు.