హోంమంత్రి పర్యటన ఏర్పాట్లను పరిశీలించిన ఎమ్మెల్యేలు ఎం.ఎస్. రాజు, బండారు శ్రావణి

అనంతపురం బ్యూరో : శింగనమల నియోజకవర్గ పరిధిలోని అలంకారాయునిపేట గ్రామానికి ఈ నెల 5వ తేదీన రాష్ట్ర హోంశాఖ మంత్రి వంగలపూడి అనిత రానున్న నేపథ్యంలో పర్యటన ఏర్పాట్లను మడకశిర ఎమ్మెల్యే ఎం.ఎస్. రాజు, శింగనమల ఎమ్మెల్యే బండారు శ్రావణి, జిల్లా ఎస్పీ క్షేత్రస్థాయిలో పరిశీలించారు.

మంత్రి పర్యటనలో భాగంగా గ్రామంలో నిర్మించిన సీసీ రోడ్డు, వాటర్ ట్యాంక్, బస్టాండ్‌ను ప్రారంభించడంతో పాటు నూతన బ్రిడ్జి నిర్మాణానికి శంకుస్థాపన చేయనున్నారు. ఈ కార్యక్రమానికి పలువురు మంత్రులు కూడా హాజరుకానున్నారు.

ఈ నేపథ్యంలో సభా ప్రాంగణం, హెలిప్యాడ్, వాహనాల పార్కింగ్ స్థలాలను స్థానిక అధికారులతో కలిసి ఎమ్మెల్యేలు, జిల్లా ఎస్పీ పరిశీలించారు. కార్యక్రమంలో ఎలాంటి ఇబ్బందులు తలెత్తకుండా ముందస్తు ఏర్పాట్లు పక్కాగా చేపట్టాలని అధికారులకు సూచించారు. భద్రతా చర్యల విషయంలో అప్రమత్తంగా ఉండాలని, అన్ని శాఖల అధికారులు సమన్వయంతో పనిచేసి మంత్రి పర్యటనను సజావుగా నిర్వహించాలని ఆదేశించారు.