హత్యాయత్నం కేసులో నిందితుడికి ఏడేళ్లు జైలు

గోపాలపురం, మేజర్ న్యూస్ అక్టోబర్ 05:

రెండు వేర్వేరు హత్యాయత్నం కేసుల్లో నిందితుడికి ఏడేళ్ల జైలు శిక్షతో పాటు రూ.6 వేల జరిమానా విధిస్తూ కొవ్వూరు ప్రిన్సిపల్ సీనియర్ సివిల్ జడ్జి గంధం వెంకట లక్ష్మీ సరస్వతి సోమవారం తీర్పు వెలువరించినట్లు గోపాలపురం ఎస్సై వి. సుబ్రహ్మణ్యం తెలిపారు.

ఆయన తెలిపిన వివరాల ప్రకారం.. గోపాలపురం పోలీస్‌స్టేషన్ పరిధిలోని హుకుంపేటలో 2021 మే 30న స్థల వివాదం కారణంగా గేరా వీర వెంకట సత్యనారాయణ అలియాస్ జగన్ అనే వ్యక్తి.. నాయుడు వీర కృష్ణపై గునపంతో దాడి చేసి తీవ్రంగా గాయపరిచాడు. అదే రోజు కొద్దిసేపటి తర్వాత తన కోడలి ఉద్యోగానికి సంబంధించిన పాత గొడవల కారణంగా మునిశెట్టి సాయి శ్రీ కళ్యాణ్, మునిశెట్టి లక్ష్మీలపై కూడా కత్తితో దాడి చేసి గాయపరిచాడని ఎస్సై తెలిపారు.

ఈ ఘటనలపై గోపాలపురం పోలీస్‌స్టేషన్‌లో రెండు హత్యాయత్నం కేసులు నమోదు చేసినట్లు ఎస్సై తెలిపారు. నిందితుడిని 2021 జూన్ 10న అరెస్టు చేసి, అనంతరం కోర్టులో చార్జిషీట్లు దాఖలు చేసినట్లు పేర్కొన్నారు. కేసుల విచారణలో కోర్టు కానిస్టేబుల్ ఎస్. భాను సమన్వయంతో ప్రాసిక్యూషన్ తరఫున జిల్లా అదనపు పబ్లిక్ ప్రాసిక్యూటర్ మర్రి వెంకటేష్ వాదనలు వినిపించారని తెలిపారు.

సాక్ష్యాధారాలను పరిశీలించిన న్యాయస్థానం నిందితుడిని నేరస్థుడిగా నిర్ధారించినట్లు ఎస్సై తెలిపారు. క్రైమ్ నంబర్ 149/2021లో ఏడేళ్ల జైలు శిక్ష, రూ.3 వేల జరిమానా, క్రైమ్ నంబర్ 150/2021లో ఏడేళ్ల జైలు శిక్ష, రూ.3 వేల జరిమానా కోర్టు విధించిందన్నారు. రెండు శిక్షలు ఏకకాలంలో అమలు అయ్యేలా కోర్టు తీర్పు ఇచ్చిందని వివరించారు.

కేసుల దర్యాప్తు, ప్రాసిక్యూషన్‌కు సహకరించిన గోపాలపురం ఎస్సై వి. సుబ్రహ్మణ్యం, కోర్టు కానిస్టేబుల్ ఎస్.భాను, కానిస్టేబుల్ బి. రంగారావులను జిల్లా ఎస్పీ నరసింహ కిశోర్ అభినందించినట్లు ఎస్సై తెలిపారు.