దసరా ఏర్పాట్లపై దేవాదాయ కమిషనర్ క్షేత్రస్థాయి పరిశీలన

ఇంద్రకీలాద్రి,  మేజర్ న్యూస్ : ఇంద్రకీలాద్రిపై అక్టోబర్ 11 నుంచి ప్రారంభం కానున్న పరాభవ నామ సంవత్సర దసరా శరన్నవరాత్రి మహోత్సవాల ఏర్పాట్లను దేవాదాయ ధర్మాదాయ శాఖ కమిషనర్ కె. రామచంద్ర మోహన్ సోమవారం క్షేత్రస్థాయిలో పరిశీలించారు. ఆలయ కార్యనిర్వహణాధికారి వి.కె. శీనా నాయక్‌తో కలిసి ఘాట్ రోడ్డు, కొండచరియలు పడిన ప్రాంతాల్లో చేపట్టిన రక్షణ చర్యలు, నూతన పూజా మండపం, కొత్త లడ్డూ పోటు భవనం, ప్రధాన ఆలయ ప్రాంగణంతో పాటు మల్లేశ్వరస్వామి ఆలయ నిష్క్రమణ మెట్ల మార్గాన్ని పరిశీలించారు. దసరా సమయంలో భారీగా భక్తులు తరలిరానున్న నేపథ్యంలో నిష్క్రమణ మార్గంలో రద్దీ, తోపులాటలు లేకుండా బారికేడింగ్, భద్రతా ఏర్పాట్లు పటిష్టం చేయాలని అధికారులను ఆదేశించారు. సుమారు 25 లక్షల మంది భక్తులు వచ్చే అవకాశం ఉన్నందున నిర్మాణ, మరమ్మతు పనులను ఎలాంటి జాప్యం లేకుండా యుద్ధప్రాతిపదికన పూర్తి చేయాలని ఇంజినీరింగ్ అధికారులకు స్పష్టం చేశారు. భక్తుల భద్రత, క్యూలైన్ల నిర్వహణ, పారిశుద్ధ్యానికి అత్యధిక ప్రాధాన్యత ఇవ్వాలని సూచించారు. ఈ కార్యక్రమంలో ఆలయ ట్రస్ట్ బోర్డు సభ్యులు, ఇంజినీరింగ్ అధికారులు పాల్గొన్నారు.


✍️ ప్రేమ్ రాజ్, విజయవాడ.