గుడిపల్లి జడ్పీటీసీగా మంజుప్రియ వెంకటేష్ ఘన విజయం

11,094 ఓట్ల భారీ మెజారిటీతో విజయకేతనం.. స్థానిక నాయకుల అభినందనలు

ప్రజల నమ్మకాన్ని నిలబెట్టుకుంటా.. ప్రతి సమస్య పరిష్కారానికి కృషి చేస్తా: మంజుప్రియ వెంకటేష్

గుడిపల్లి మేజర్ న్యూస్: గుడిపల్లి మండల జడ్పీటీసీ ఎన్నికల్లో తెలుగుదేశం పార్టీ తరఫున పోటీ చేసిన మంజుప్రియ వెంకటేష్ ఘన విజయం సాధించారు. తన సమీప ప్రత్యర్థిపై 11,094 ఓట్ల భారీ మెజారిటీతో విజయాన్ని అందుకున్నారు. ఈ ఎన్నికల్లో మంజుప్రియ వెంకటేష్‌కు 19,289 ఓట్లు రాగా, ప్రత్యర్థికి 8,195 ఓట్లు పోలయ్యాయి. ప్రజలు తనపై ఉంచిన నమ్మకానికి ఈ విజయం నిదర్శనమని స్థానిక నాయకులు పేర్కొన్నారు.

విజయం అనంతరం మంజుప్రియ వెంకటేష్‌ను గుడిపల్లి మండలానికి చెందిన పలువురు తెలుగుదేశం పార్టీ నాయకులు, కార్యకర్తలు, అభిమానులు కలిసి పుష్పగుచ్ఛాలు అందజేసి ఘనంగా అభినందించారు. ఈ సందర్భంగా నాయకులు ఆమెకు శుభాకాంక్షలు తెలియజేస్తూ, మండల అభివృద్ధికి కృషి చేయాలని ఆకాంక్షించారు.

ఈ సందర్భంగా మంజుప్రియ వెంకటేష్ మాట్లాడుతూ.. "గుడిపల్లి మండల ప్రజలు నాపై ఉంచిన నమ్మకాన్ని ఎప్పటికీ మరచిపోలేను. ఈ విజయం నాది మాత్రమే కాదు.. నన్ను నమ్మి ఆదరించిన ప్రతి ఒక్కరిది. నాకు ఓటు వేసిన వారితో పాటు ఓటు వేయని ప్రతి ఒక్కరినీ సమానంగా గౌరవిస్తూ ప్రజాప్రతినిధిగా సేవలందిస్తాను. రాజకీయాలకు అతీతంగా ప్రతి గ్రామాన్ని, ప్రతి కుటుంబాన్ని నా సొంత కుటుంబంగా భావించి పనిచేస్తాను" అని తెలిపారు.

మండలంలోని ప్రతి గ్రామంలో నెలకొన్న తాగునీరు, రహదారులు, పారిశుద్ధ్యం, విద్య, వైద్యం, సాగునీరు తదితర సమస్యలను గుర్తించి వాటి పరిష్కారానికి ప్రాధాన్యత ఇస్తానని హామీ ఇచ్చారు. ప్రజలకు అందుబాటులో ఉంటూ వారి సమస్యలను నేరుగా తెలుసుకుని సంబంధిత అధికారుల దృష్టికి తీసుకెళ్లి పరిష్కారమయ్యేలా నిరంతరం కృషి చేస్తానన్నారు.

ముఖ్యమంత్రి నారా చంద్రబాబు నాయుడు నాయకత్వంలో ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజలకు చేరవేయడంతో పాటు గుడిపల్లి మండలాన్ని అభివృద్ధి పథంలో ముందుకు తీసుకెళ్లేందుకు తన వంతు కృషి చేస్తానని పేర్కొన్నారు. ఎన్నికల సమయంలో ప్రజలకు ఇచ్చిన హామీలను మరచిపోకుండా ఒక్కొక్కటిగా నెరవేర్చేందుకు కృషి చేస్తానని తెలిపారు.

"నా విజయం కోసం అహర్నిశలు శ్రమించిన పార్టీ నాయకులకు, కార్యకర్తలకు, ప్రతి గ్రామంలోని పార్టీ శ్రేణులకు, మహిళలకు, యువతకు, పెద్దలకు, అభిమానులకు హృదయపూర్వక కృతజ్ఞతలు. ఎండనక, వాననక ప్రచారంలో పాల్గొని నాకు అండగా నిలిచిన ప్రతి ఒక్కరి కృషి ఈ విజయానికి కారణం. మీ అందరి నమ్మకాన్ని నిలబెట్టుకుంటూ ప్రజాసేవకే నా జీవితాన్ని అంకితం చేస్తాను" అని మంజుప్రియ వెంకటేష్ కృతజ్ఞతలు తెలిపారు.

ఈ విజయంతో గుడిపల్లి మండలంలో తెలుగుదేశం పార్టీ శ్రేణుల్లో ఆనందోత్సాహాలు నెలకొన్నాయి.

సూర్య రిపోర్టర్: లెనిన్ గుడిపల్లి మండలం