గ్రంథాలయాలే విజ్ఞాన భాండాగారాలు -ముగింపు వేడుకలలో చైర్మన్ డాక్టర్ గురువారెడ్డి -విజేతలకు ప్రశంసా పత్రాలు, మెమెంటోలు అందజేత
ఎడ్యుకేషన్ స్టాఫ్ రిపోర్టర్ : గ్రంథాలయాలే విజ్ఞాన భాండాగారాలని, సరస్వతి దేవి నిలయాలైన గ్రంథాలయాల ద్వారానే విద్యార్థులు మేధాశక్తిని పెంచుకోవాలని ఉమ్మడి చిత్తూరు జిల్లా గ్రంథాలయ సంస్థ చైర్మన్ డాక్టర్ రెడ్డివారి గురవారెడ్డి పిలుపునిచ్చారు. ఈనెల 14వ తేదీ నుంచి ప్రారంభమైన 59వ జాతీయ గ్రంథాలయ వారోత్సవాలు శుక్రవారం తిరుపతిలోని ప్రథమ శ్రేణి గ్రంథాలయంలో ముగింపు వేడుకలు ఘనంగా ముగిశాయి. ఈ కార్యక్రమానికి ఆయన ముఖ్యఅతిథిగా హాజరై ఏడు రోజుల పాటు నిర్వహించిన వారోత్సవాల ముగింపు వేడుకలను ఘనంగా నిర్వహించుకుంటున్నామన్నారు. విద్యార్థి దశ నుంచే పుస్తక పఠనం వైపు మొగ్గు చూపాలని, గ్రంథాలయానికి రీడర్లు, విద్యార్థులు ఎక్కువ మంది వచ్చే విధంగా ప్రచారం కల్పించేందుకే ఈ వారోత్సవాలు నిర్వహించామన్నారు. రాష్ట్రంలో కూటమి ప్రభుత్వం ముఖ్యమంత్రి నారా చంద్రబాబు నాయుడు నాయకత్వంలో విద్యాశాఖ మంత్రి నారా లోకేష్ సారథ్యంలో గ్రంథాలయాల అభివృద్ధి లక్ష్యంతో పని చేస్తోందన్నారు. గ్రంథాలయాల్లో పుస్తకాలను వినియోగించుకొని మేధాశక్తిని పెంచుకొని మంచి పౌరులుగా తీర్చిదిద్దబడి సమాజానికి ఉపయోగపడాలని ఆకాంక్షించారు. అనంతరం నిర్వహించిన వ్యాసరచన, చిత్రలేఖనం, డ్రాయింగ్ తదితర పోటీల్లో విజేతలుగా నిలిచిన విద్యార్థినులకు ప్రశంసా పత్రాలు, మెమెంటోలు, మెడల్స్, పుస్తకాలు, పెన్నులు అందజేశారు. వారోత్సవాలకు సంబంధించిన సర్టిఫికెట్లు, మెమెంటోలకు కేవీఆర్ జ్యువెలర్స్ యజమాని కేవీ నారాయణమూర్తి విరాళంగా అందజేశారు. నడ్డి నారాయణ, డాక్టర్ మునిలక్ష్మి, రిటైర్డ్ బ్యాంక్ మేనేజర్ గుప్తా, సీనియర్ లైబ్రేరియన్ నటరాజ నాయుడు, రిటైర్డ్ ప్రొఫెసర్ గోపాల్, ప్రాంతీయ గ్రంథాలయ అధికారి ధనంజయులు, సోము ఉమాపతి, పెద్ద ఎత్తున విద్యార్థినులు పాల్గొన్నారు.
సీఎం గౌడ్ తిరుపతి స్టాప్ రిపోర్టర్