గాంధీజీ జీవితం ఆదర్శనీయం -ఆశయాలను ఆచరిస్తూ సమాజ అభివృద్ధికి కృషి చేయాలి : జెసి ఆర్.గోవింద రావు

మహాత్మా గాంధీ జీవితం ఆయన ఆచరించిన విలువలో ప్రతి ఒక్కరికి ఆదర్శనీయమని జాయింట్ కలెక్టర్ ఆర్ గోవిందరావు పేర్కొన్నారు. గాంధీ జయంతి సందర్భంగా కలెక్టరేట్ సమావేశ మందిరంలో గాంధీ చిత్రపటానికి జాయింట్ కలెక్టర్ ఆర్.గోవింద రావు, జిల్లా రెవెన్యూ అధికారి నరసింహులు పూలమాలలు వేసి ఘనంగా నివాళులు అర్పించారు. ఈ సందర్భంగా జాయింట్ కలెక్టర్ మాట్లాడుతూ మహాత్మ గాంధీ సత్యం, అహింసా సిద్ధాంతాలను ఆచరిస్తూ దేశ స్వాతంత్ర్య ఉద్యమానికి నాయకత్వం వహించారని తెలిపారు. గాంధీజీ చూపిన సత్యం, అహింస, శాంతి, స్వచ్ఛత మార్గాలు నేటి తరానికి కూడా ఎంతో స్ఫూర్తిదాయకమని పేర్కొన్నారు. గాంధీజీ ఆశయాలను ప్రతి ఒక్కరూ ఆచరిస్తూ సమాజ అభివృద్ధికి తమ వంతు కృషి చేయాలని పిలుపునిచ్చారు. జిల్లా రెవెన్యూ అధికారి మాట్లాడుతూ, మహాత్మా గాంధీ జీవితం, ఆయన ఆచరించిన విలువలు ప్రతి ఒక్కరికీ ఆదర్శప్రాయమని తెలిపారు. సత్యం, అహింస, సమానత్వం, స్వచ్ఛత వంటి గాంధీజీ ఆశయాలను జీవితంలో పాటిస్తూ, సమాజంలో సానుకూల మార్పుకు ప్రతి ఒక్కరూ కృషి చేయాలని సూచించారు.ఈ కార్యక్రమంలో కలెక్టరేట్ అధికారులు, సిబ్బంది పాల్గొన్నారు.