గాజువాకలో ఘనంగా అమరవీరుల సంస్మరణ.. విద్యార్థులకు పోలీసు సేవలపై చైతన్యం

గాజువాక, సూర్య : పోలీసు అమరవీరుల గుర్తుగా గాజువాక పోలీస్ స్టేషన్‌లో శనివారం 'ఓపెన్ హౌస్' కార్యక్రమం నిర్వహించారు. విశాఖపట్నం సిటీ పోలీస్ కమిషనర్ శంకబ్రత బాగ్చి ఆదేశాల మేరకు, సీఐ వాసు నాయుడు ఆధ్వర్యంలో జరిగిన ఈ కార్యక్రమానికి శ్రీనగర్‌కు చెందిన శ్రీ రాఘవేంద్ర స్కూల్ విద్యార్థులు హాజరయ్యారు. ​ఈ సందర్భంగా పోలీస్ స్టేషన్ పనితీరు, పోలీసుల విధులు, బాధ్యతలు మరియు ప్రజలకు అందించే సేవల గురించి విద్యార్థులకు వివరంగా తెలియజేశారు. బాధితుల నుంచి ఫిర్యాదులు స్వీకరించడం, కేసులు నమోదు చేయడం, దర్యాప్తు ప్రక్రియ మరియు శాంతిభద్రతల పరిరక్షణకు పోలీసులు చేపడుతున్న చర్యలను విద్యార్థులకు ప్రత్యక్షంగా చూపించారు. పోలీసులు విధుల్లో ఉపయోగించే వివిధ రకాల ఆయుధాలు, ఆధునిక సాంకేతిక పరికరాలను ప్రదర్శించి, వాటి ఉపయోగాలు వివరించారు. నేర పరిశోధనలో సాంకేతికత ఏ విధంగా తోడ్పడుతుందో అధికారులు తెలిపారు. ప్రజల రక్షణ కోసం ప్రాణాలు అర్పించిన పోలీసు అమరవీరుల త్యాగాలను ప్రతి ఒక్కరూ స్మరించుకోవాలని కోరారు. ఇటువంటి కార్యక్రమాలు విద్యార్థుల్లో క్రమశిక్షణ, చట్టాల పట్ల అవగాహన మరియు సామాజిక బాధ్యతను పెంపొందిస్తాయని పోలీసు అధికారులు పేర్కొన్నారు.

రిపోర్టర్ : కోటి రెడ్డి, గాజువాక, విశాఖపట్నం.