మృతి చెందిన సర్పంచ్ కుటుంబానికి అండగా ఉంటా: స్పీకర్ గడ్డం ప్రసాద్ కుమార్

వికారాబాద్, మేజర్ న్యూస్: ధరూర్ మండలం అల్లిపూర్ గ్రామ సర్పంచ్ గొట్టిముక్కల వీరేశం కుటుంబానికి అండగా ఉంటానని తెలంగాణ శాసనసభాపతి, వికారాబాద్ ఎమ్మెల్యే గడ్డం ప్రసాద్ కుమార్ భరోసా ఇచ్చారు. 28 రోజుల క్రితం అనారోగ్యంతో మృతి చెందిన వీరేశం కుటుంబ సభ్యులను శనివారం ఆయన పరామర్శించి, వారి దుఃఖంలో పాలుపంచుకున్నారు. కుటుంబ సభ్యులకు ధైర్యం చెబుతూ, ఏ కష్టమొచ్చినా అండగా ఉంటానని భరోసా కల్పించారు.వీరేశం వైద్య చికిత్స కోసం చేసిన ఖర్చులకు సంబంధించి సీఎం రిలీఫ్ ఫండ్ ద్వారా ఆర్థిక సహాయం అందేలా కృషి చేస్తానని స్పీకర్ హామీ ఇచ్చారు. కుటుంబ సభ్యులు ధైర్యం కోల్పోవద్దని, అవసరమైన సమయంలో సహాయ సహకారాలు అందించేందుకు తాను సిద్ధంగా ఉంటానని తెలిపారు. మృతుడి కుటుంబానికి ప్రభుత్వం తరఫున అందాల్సిన సహాయం అందేలా కృషి చేస్తానని పేర్కొన్నారు.