ఎయిర్‌పోర్టు నిర్వాసితుల నిరసన. హామీల అమలుకు తహసీల్దార్ కార్యాలయం వద్ద ఆందోళన.

గన్నవరం, అక్టోబర్ 3, మేజర్ న్యూస్, ప్రతినిధి, (గుర్రం ప్రసాద్).

గన్నవరం విమానాశ్రయ విస్తరణ కోసం భూములు ఇచ్చిన నిర్వాసితులు తమకు న్యాయం చేయాలని కోరుతూ స్థానిక తహసీల్దార్ కార్యాలయం వద్ద చేపట్టిన నిరసన శనివారానికి ఆరో రోజుకు చేరింది. 2013 భూసేకరణ చట్టం, 2020లో జారీ చేసిన జీవో ప్రకారం పరిహారం, పునరావాసం కల్పించాలని వారు డిమాండ్ చేశారు. సీపీఎం, సీపీఐ నాయకులు నిరసనకు మద్దతు తెలిపారు. ఈ సందర్భంగా కాంగ్రెస్‌ నాయకురాలు సుంకర పద్మశ్రీ మాట్లాడుతూ.. విమానాశ్రయ అభివృద్ధికి భూములు ఇచ్చిన చిన్న, సన్నకారు రైతులకు 11 ఏళ్లుగా పూర్తిస్థాయిలో న్యాయం జరగలేదని ఆరోపించారు. సుమారు 800 ఎకరాల భూములు తీసుకున్నప్పటికీ బాధితుల సమస్యలు పరిష్కారం కాలేదన్నారు. నిర్వాసితులకు రావాల్సిన పరిహారం సుమారు రూ.120 కోట్ల వరకు ఉందని పేర్కొన్నారు. ప్రభుత్వాలు మారుతున్నా ఎయిర్‌పోర్టు నిర్వాసితుల సమస్యలు పరిష్కారం కావడం లేదని ఆమె విమర్శించారు. స్థానిక ఎమ్మెల్యే యార్లగడ్డ వెంకట్రావు వెంటనే నిర్వాసితుల వద్దకు వచ్చి వారి సమస్యలపై స్పష్టమైన హామీ ఇవ్వాలని డిమాండ్ చేశారు. ఎయిర్‌పోర్టు వద్ద గతంలో నిరసన తెలిపిన నిర్వాసితులను అరెస్టు చేయడం సరికాదన్నారు. నిర్వాసితులకు న్యాయం జరిగే వరకు పోరాటం కొనసాగిస్తామని తెలిపారు.