ఎన్నికల ప్రచారానికి ముందస్తు అనుమతులు తప్పనిసరి..ఎస్సై శ్రీనివాసులు
వాహనాలు, లౌడ్ స్పీకర్ల వినియోగానికి ప్రత్యేక అనుమతి తీసుకోవాలి
ఉదయం 6 నుంచి రాత్రి 10 గంటల వరకు మాత్రమే లౌడ్ స్పీకర్లకు అనుమతి
గుడుపల్లి మేజర్ న్యూస్: పంచాయతీ ఎన్నికల నేపథ్యంలో అభ్యర్థులు ఎన్నికల ప్రచారం నిర్వహించే సమయంలో ఎన్నికల నియమ నిబంధనలను తప్పనిసరిగా పాటించాలని గుడుపల్లి మండల ఎస్సై శ్రీనివాసులు సూచించారు. ప్రచార వాహనాలు, లౌడ్ స్పీకర్ల వినియోగానికి ముందస్తు అనుమతులు తీసుకోవాలని స్పష్టం చేశారు.
వాహనాల అనుమతికి నిబంధనలు
ఎన్నికల ప్రచారానికి వినియోగించే వాహనాలకు సంబంధించి ముందుగా గుడుపల్లి తహసీల్దార్ కార్యాలయంలో అనుమతి పొందాలి. వాహనాలకు సంబంధించిన రిజిస్ట్రేషన్ పత్రాలు, బీమా, కాలుష్య నియంత్రణ ధ్రువీకరణ పత్రం, డ్రైవింగ్ లైసెన్స్ తదితర పత్రాలు తప్పనిసరిగా ఉండాలి. సంబంధిత అనుమతి లేకుండా ప్రచార వాహనాలను వినియోగించకూడదు.
లౌడ్ స్పీకర్లకు ప్రత్యేక అనుమతి
లౌడ్ స్పీకర్ల వినియోగానికి ముందుగా మీ సేవ కేంద్రంలో దరఖాస్తు చేసుకోవాలి. అనంతరం గుడుపల్లి పోలీస్ స్టేషన్ నుంచి ప్రత్యేక అనుమతి పొందాలి. అనుమతి లేకుండా లౌడ్ స్పీకర్లను వినియోగించరాదు. ఉదయం 6 గంటల నుంచి రాత్రి 10 గంటల వరకు మాత్రమే లౌడ్ స్పీకర్ల ద్వారా ప్రచారం నిర్వహించాలి.
అభ్యర్థులు పాటించాల్సిన ముఖ్యమైన నియమాలు
ప్రచార వాహనాలు, సమావేశాలు, ర్యాలీల వివరాలను ముందుగానే సంబంధిత అధికారులకు తెలియజేసి అనుమతులు పొందాలి. ఎన్నికల సంఘం మార్గదర్శకాల ప్రకారం వాహనంలో డ్రైవర్తో కలిపి గరిష్ఠంగా ఇద్దరు మాత్రమే ఉండాలి. ప్రచార సమయంలో ఎన్నికల ప్రవర్తనా నియమావళిని కచ్చితంగా పాటించాలి. అనుమతి పత్రాలను ప్రచార వాహనాల ముందు భాగంలో స్పష్టంగా కనిపించేలా ఉంచాలి.
అభ్యర్థులందరూ ఎన్నికల నిబంధనలు, ప్రభుత్వ మార్గదర్శకాలను తప్పనిసరిగా పాటించాలని, అనుమతులు లేకుండా ప్రచార వాహనాలు, లౌడ్ స్పీకర్లను వినియోగించరాదని ఎస్సై శ్రీనివాసులు సూచించారు. నిబంధనలు ఉల్లంఘించిన వారిపై చట్టపరమైన చర్యలు తీసుకుంటామని హెచ్చరించారు.
సూర్య రిపోర్టర్:- లెనిన్, గుడిపల్లి మండలం