ఎన్నికల నియమావళిని ఉల్లంఘించినా, శాంతిభద్రతలకు విఘాతం కలిగించినా కఠిన చర్యలు తప్పవు : జిల్లా ఎస్పీ బి.ఉమామహేశ్వర్

బాపట్ల, మేజర్‌న్యూస్‌ :

బాపట్ల మున్సిపాలిటీ ఎన్నికల నామినేషన్ ప్రక్రియ కొనసాగుతున్న నేపథ్యంలో, ఈ నెల 15వ తేదీ నుంచి ప్రారంభం కానున్న గ్రామ పంచాయతీ మొదటి విడత ఎన్నికల నామినేషన్ ప్రక్రియను దృష్టిలో ఉంచుకొని జిల్లా వ్యాప్తంగా పటిష్టమైన పోలీస్ భద్రతా ఏర్పాట్లు చేపట్టినట్లు జిల్లా ఎస్పీ శ్రీ బి. ఉమామహేశ్వర్ ఐపీఎస్ గారు తెలిపారు. ఎన్నికల ప్రక్రియ ప్రశాంతంగా, పారదర్శకంగా జరిగేలా జిల్లా వ్యాప్తంగా 30 పోలీస్ యాక్ట్ అమలు చేయడంతో పాటు, నామినేషన్ కేంద్రాల వద్ద సెక్షన్ 163 BNSS ( సెక్షన్ 144) అమలు చేస్తున్నట్లు పేర్కొన్నారు.

నామినేషన్ కేంద్రాల్లోకి అభ్యర్థితో పాటు కేవలం ఇద్దరు ప్రతినిధులకు మాత్రమే అనుమతి ఉంటుందని, నామినేషన్ కేంద్రాల వద్దకు ర్యాలీలు, ఊరేగింపులుగా రావడం, గుంపులుగా చేరడం పూర్తిగా నిషేధమని స్పష్టం చేశారు. నామినేషన్ కేంద్రాలకు 100 నుంచి 200 మీటర్ల పరిధిలో జనసమూహాలుగా గుమిగూడడం, నినాదాలు చేయడం, ఎన్నికల ప్రచార కార్యక్రమాలు నిర్వహించడం అనుమతించబడదని తెలిపారు.

నామినేషన్ కేంద్రాల వద్ద ఎలాంటి అవాంఛనీయ సంఘటనలు చోటుచేసుకోకుండా సీసీ కెమెరాలు, డ్రోన్ల ద్వారా నిరంతరం నిఘా ఏర్పాటు చేస్తున్నామని, పోలీస్ అధికారులు, సిబ్బంది అప్రమత్తంగా ఉంటూ పరిస్థితులను పర్యవేక్షిస్తారని తెలిపారు. ఎన్నికల నియమావళి, పోలీస్ శాఖ విధించిన ఆంక్షలను ప్రతి ఒక్కరూ తప్పనిసరిగా పాటించాలని సూచించారు.

ఎన్నికల నిబంధనలు ఉల్లంఘించినా, శాంతిభద్రతలకు భంగం కలిగించేలా వ్యవహరించినా సంబంధిత వ్యక్తులపై చట్టపరమైన కఠినమైన చర్యలు తీసుకుంటామని హెచ్చరించారు. ప్రజాస్వామ్యబద్ధంగా, ప్రశాంత వాతావరణంలో ఎన్నికల ప్రక్రియ పూర్తయ్యేలా అభ్యర్థులు, రాజకీయ పార్టీల ప్రతినిధులు, ప్రజలు సంయమనం పాటిస్తూ పోలీస్ శాఖకు పూర్తిస్థాయిలో సహకరించాలని జిల్లా ఎస్పీ గారు తెలిపారు.