చందర్లపాడు మండల అభివృద్ధికి సంపూర్ణ సహకారం అందిస్తా : ఎంపీ కేశినేని చిన్ని

విజయవాడ మేజర్ న్యూస్ : ఎన్నికల్లో విజయం సాధించిన వెంటనే పదవుల సంబరాలు, రాజకీయ హడావుడికే పరిమితం కాకుండా ప్రజలు ఎదుర్కొంటున్న సమస్యల పరిష్కారానికి ప్రాధాన్యత ఇవ్వాలని విజయవాడ పార్లమెంట్ సభ్యుడు కేశినేని శివనాథ్ చిన్ని సూచించారు. ప్రజలు తమపై ఉంచిన నమ్మకాన్ని నిలబెట్టుకుంటూ, ఎన్నికల సమయంలో ఇచ్చిన హామీలను ఆచరణలోకి తీసుకువచ్చే దిశగా ప్రతి ఒక్కరూ బాధ్యతతో పనిచేయాలని అన్నారు. బుధవారం విజయవాడలోని ఎంపీ కార్యాలయంలో నందిగామ నియోజకవర్గం చందర్లపాడు మండలానికి చెందిన నూతనంగా ఎన్నికైన తెలుగుదేశం పార్టీ జడ్పీటీసీ, ఎంపీటీసీ సభ్యులు, పార్టీ నాయకులు ఎంపీ కేశినేని చిన్నిని మర్యాదపూర్వకంగా కలిశారు. ఈ సందర్భంగా నూతన ప్రజాప్రతినిధులకు ఆయన అభినందనలు తెలిపారు. ఈ భేటీలో చందర్లపాడు మండలంలోని వివిధ గ్రామాల్లో నెలకొన్న ప్రజా సమస్యలు, స్థానికంగా ఎదురవుతున్న ఇబ్బందులు, అభివృద్ధికి సంబంధించిన అంశాలను ప్రజాప్రతినిధులు ఎంపీ దృష్టికి తీసుకువచ్చారు. అనంతరం ఎంపీ కేశినేని చిన్ని మాట్లాడుతూ, ప్రజలు అందించిన విజయాన్ని ఒక బాధ్యతగా స్వీకరించాలని, ప్రజలు అప్పగించిన పదవులు వ్యక్తిగత హోదా, ప్రతిష్ఠ కోసం కాకుండా ప్రజలకు సేవ చేసేందుకు లభించిన అవకాశాలని పేర్కొన్నారు. ఎన్నికల్లో గెలిచిన వెంటనే సంబరాలు చేసుకోవడం కంటే ప్రజలు తమపై పెట్టుకున్న ఆశలు, ఆకాంక్షలను గుర్తించి వారి సమస్యల పరిష్కారానికి కృషి చేయడం ముఖ్యమన్నారు. నూతనంగా ఎన్నికైన జడ్పీటీసీ, ఎంపీటీసీ సభ్యులు బాధ్యతలు స్వీకరించిన తొలిరోజు నుంచే ప్రజలకు అందుబాటులో ఉంటూ గ్రామాల అభివృద్ధికి కృషి చేయాలని సూచించారు. ప్రజలు తమ సమస్యల పరిష్కారం కోసం ప్రజాప్రతినిధుల వద్దకు వచ్చినప్పుడు వారికి భరోసా కల్పించాలని, ప్రతి సమస్యను బాధ్యతగా స్వీకరించి పరిష్కారం దిశగా ముందుకు వెళ్లాలని అన్నారు. గ్రామాల్లో మౌలిక సదుపాయాలు, అభివృద్ధి కార్యక్రమాలు, స్థానికంగా ఎదురవుతున్న ఇతర సమస్యలను గుర్తించి వాటి పరిష్కారానికి సమష్టిగా కృషి చేయాలని తెలిపారు. నూతన ప్రజాప్రతినిధులు పదవులు చేపట్టిన వెంటనే మండలంలోని సమస్యలను గుర్తించి తన దృష్టికి తీసుకురావడం అభినందనీయమని పేర్కొన్నారు. చందర్లపాడు మండలంలోని గ్రామాల అభివృద్ధికి, ప్రజలు ఎదుర్కొంటున్న సమస్యల పరిష్కారానికి తన సంపూర్ణ సహకారం ఎల్లప్పుడూ ఉంటుందని స్పష్టం చేశారు. ప్రజా సమస్యలను తన దృష్టికి తీసుకువస్తే సంబంధిత అధికారులతో మాట్లాడి అవసరమైన చర్యలు తీసుకునేలా కృషి చేస్తానని భరోసా ఇచ్చారు. ప్రజాప్రతినిధులు, పార్టీ నాయకులు, కార్యకర్తలు సమన్వయంతో పనిచేస్తూ ప్రజలకు మెరుగైన సేవలు అందించాలని సూచించారు. గ్రామస్థాయిలో ప్రజలతో నిరంతరం మమేకమై వారి అవసరాలను తెలుసుకుంటూ అభివృద్ధి కార్యక్రమాలను ముందుకు తీసుకెళ్లాలని అన్నారు. ప్రజల ఆశీస్సులతో లభించిన విజయాన్ని ప్రజాసేవకు లభించిన అవకాశంగా భావించి ప్రతి గ్రామాన్ని అభివృద్ధి పథంలో ముందుకు తీసుకెళ్లేందుకు అందరూ కలిసికట్టుగా పనిచేయాలని ఎంపీ కేశినేని శివనాథ్ చిన్ని పిలుపునిచ్చారు. ప్రజా సమస్యల పరిష్కారానికి, చందర్లపాడు మండల సమగ్ర అభివృద్ధికి తాను ఎల్లప్పుడూ అండగా ఉంటానని పునరుద్ఘాటించారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.