భీరం శ్రీధర్ రెడ్డి ఇంటర్నేషనల్ స్కూల్ లో ఘనంగా బాలల దినోత్సవ వేడుకలు

ఖాజీపేట మేజర్ న్యూస్:పండిట్ జవహర్‌లాల్ నెహ్రూ జయంతిని పురస్కరించుకుని శనివారం భీరం శ్రీధర్ రెడ్డి ఇంటర్నేషనల్ స్కూల్‌లో బాలల దినోత్సవ వేడుకలను ఘనంగా నిర్వహించారు. చిన్నారులను ఉత్సాహపరిచేందుకు ఉపాధ్యాయులు ప్రత్యేకంగా ప్రదర్శించిన సాంస్కృతిక కార్యక్రమాలు, ఆటపాటలు విశేషంగా ఆకట్టుకున్నాయి.
​కార్యక్రమానికి ముఖ్య అతిథిగా విచ్చేసిన గ్రూప్–1 అధికారి భీరం శ్రీకాంత్ రెడ్డి మాట్లాడుతూ.. మాజీ రాష్ట్రపతి డాక్టర్ ఏపీజే అబ్దుల్ కలాం స్ఫూర్తిదాయక సందేశాన్ని విద్యార్థులకు వివరించారు. మనల్ని నిద్రపోనివ్వకుండా చేసే గొప్ప లక్ష్యాలే నిజమైన కలలని పేర్కొంటూ, క్రమశిక్షణ, పట్టుదల, ఆత్మవిశ్వాసంతో ఉన్నత శిఖరాలను అధిరోహించాలని సూచించారు.
​పాఠశాల కరస్పాండెంట్ సుబ్బారెడ్డి మాట్లాడుతూ.. పిల్లలు పెద్దల మాటల కంటే చేతలను ఎక్కువగా అనుసరిస్తారని, తల్లిదండ్రులు, ఉపాధ్యాయులు మంచి విలువలను ఆచరిస్తూ వారికి ఆదర్శంగా నిలవాలన్నారు. ఈ వేడుకలు ప్రతి విద్యార్థి జీవితంలో మంచి మార్పుకు నాంది కావాలని పాఠశాల డైరెక్టర్ స్వాతి శ్రీకాంత్ ఆకాంక్షించారు. కార్యక్రమంలో ప్రిన్సిపాల్ శ్వేత, ఉపాధ్యాయులు, విద్యార్థులు పాల్గొన్నారు.

బోర్రా శివరామిరెడ్డి సూర్య రిపోర్టర్ ఖాజీపేట