బీసీలకు జరిగిన అన్యాయంపై జగన్ సమాధానం చెప్పాలి 34 శాతం బీసీ రిజర్వేషన్ల అంశంపై వైసీపీ ప్రభుత్వ వైఖరిని ప్రశ్నించిన ఎమ్మెల్యే కందికుంట వెంకటప్రసాద్

అనంతపురం బ్యూరో : బీసీల రాజకీయ హక్కులు, రాజకీయ ప్రాతినిధ్యంపై వైఎస్సార్‌సీపీ అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి సమాధానం చెప్పాలని కదిరి ఎమ్మెల్యే కందికుంట వెంకటప్రసాద్ డిమాండ్ చేశారు. స్థానిక సంస్థల ఎన్నికల్లో బీసీలకు 34 శాతం రిజర్వేషన్ల అంశంపై సుప్రీంకోర్టు ఆంధ్రప్రదేశ్ ప్రభుత్వ పిటిషన్‌ను కొట్టివేసిన నేపథ్యంలో, గత వైసీపీ ప్రభుత్వ హయాంలో తీసుకున్న నిర్ణయాలపై ఆయన విమర్శలు గుప్పించారు.

బీసీలకు రాజకీయ ప్రాతినిధ్యం కల్పించే విషయంలో వైసీపీ ప్రభుత్వం అనుసరించిన విధానాల వల్ల బీసీ వర్గాలకు నష్టం జరిగిందని కందికుంట వెంకటప్రసాద్ ఆరోపించారు. బీసీల రాజకీయ భవిష్యత్తును ప్రభావితం చేసిన అంశాలపై వైసీపీ నాయకులు ప్రజలకు వివరణ ఇవ్వాలని కోరారు.

బీసీలకు అధికారం అంటే పదవులు మాత్రమే కాదు.. ఆత్మగౌరవం, రాజకీయ గుర్తింపు, సమాన అవకాశాలు అని ఎమ్మెల్యే పేర్కొన్నారు. బీసీలను కేవలం ఓటు బ్యాంకుగా చూడకుండా, పాలనలో భాగస్వాములను చేయడమే నిజమైన సామాజిక న్యాయమని అన్నారు. బీసీల అభ్యున్నతి గురించి మాట్లాడే వైసీపీ నాయకులు, గత ప్రభుత్వ హయాంలో బీసీలకు జరిగిన నష్టంపై సమాధానం చెప్పాల్సిన బాధ్యత ఉందని వ్యాఖ్యానించారు.

 బీసీలకు రాజకీయ ప్రాతినిధ్యం కల్పించడమే లక్ష్యం

స్థానిక సంస్థల ఎన్నికల్లో చట్టపరమైన నిబంధనలు, రిజర్వేషన్లకు అనుగుణంగా బీసీలకు తగిన రాజకీయ ప్రాతినిధ్యం కల్పించేందుకు కూటమి ప్రభుత్వం కట్టుబడి ఉందని కందికుంట వెంకటప్రసాద్ స్పష్టం చేశారు. బీసీల హక్కుల పరిరక్షణకు, వారి రాజకీయ ఎదుగుదలకు ప్రభుత్వం అండగా ఉంటుందని తెలిపారు.

బీసీ సోదరులు తమ హక్కుల పరిరక్షణ కోసం ఐక్యంగా నిలవాలని, గత ప్రభుత్వ విధానాలపై ప్రశ్నించాలని పిలుపునిచ్చారు. బీసీలకు జరిగిన అన్యాయంపై ప్రజాస్వామ్య పద్ధతిలో తమ అభిప్రాయాలను వ్యక్తం చేయాలని పేర్కొన్నారు.

బీసీల అభివృద్ధి, రాజకీయ న్యాయం, ఆత్మగౌరవ పరిరక్షణే తమ లక్ష్యమని ఎమ్మెల్యే కందికుంట వెంకటప్రసాద్ వెల్లడించారు.

రిపోర్టర్ : మొయినుద్దీన్, అనంతపురం బ్యూరో, అనంతపురం.