అవినీతి నిర్మూలనలో ప్రజలు భాగస్వాములు కావాలి

విజయవాడ క్రైం, మేజర్ న్యూస్ : అవినీతి రహిత సమాజ నిర్మాణానికి ప్రతి ఒక్కరూ భాగస్వాములు కావాలని నగర పోలీస్ కమిషనర్ ఎస్.వి. రాజశేఖర బాబు పిలుపునిచ్చారు. విజిలెన్స్ వారోత్సవాల్లో భాగంగా నగర పోలీస్ కమిషనర్ కార్యాలయంలో అవినీతి నిరోధక శాఖ (ఏసీబీ) రూపొందించిన ప్రత్యేక అవగాహన పోస్టర్‌ను ఆయన ఆవిష్కరించారు. ఈ సందర్భంగా కమిషనర్ మాట్లాడుతూ ప్రభుత్వ కార్యాలయాల్లో ఎవరైనా లంచం అడిగినా, అవినీతికి పాల్పడినా ప్రజలు భయపడకుండా ఏసీబీ అధికారులకు ఫిర్యాదు చేయాలని సూచించారు. పారదర్శక పాలనకు అవినీతి నిర్మూలన ఎంతో అవసరమని, సమాజంలో అవినీతి రహిత వాతావరణం నెలకొల్పేందుకు ప్రజల్లో చైతన్యం పెరగాలని పేర్కొన్నారు. అవినీతి నిర్మూలనలో ప్రజలు తమ వంతు బాధ్యతగా సహకరించాలని కోరారు. ఫిర్యాదుల కోసం ఏసీబీ టోల్‌ఫ్రీ నంబర్‌ 1064, వాట్సాప్‌ నంబర్‌ 9440440057, ఈ-మెయిల్‌ acb@ap.gov.in లేదా 0866-2428770 ఫోన్‌ నంబర్‌ను సంప్రదించాలని తెలిపారు. ఈ కార్యక్రమంలో డీసీపీలు కృష్ణకాంత్ పటేల్, కె.జి.వి. సరిత, అదనపు ఎస్పీ స్రవంతి రాయ్, డీఎస్పీ సుబ్బారావు, ఇన్‌స్పెక్టర్ ఎం.వి.ఎస్. నాగరాజు, ఇతర సిబ్బంది పాల్గొన్నారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.