ఆంధ్రాలో ఎఫ్‌సివి పొగాకు రైతులకు బార్న్‌కు రూ.50,000 వడ్డీ లేని రుణం

సూర్య తెలంగాణ డెస్క్: ఆంధ్రప్రదేశ్‌లోని ఫ్లూ-క్యూర్డ్ వర్జీనియా పొగాకు రైతులకు ఊరటనిస్తూ కేంద్ర ప్రభుత్వం కీలక నిర్ణయం తీసుకుంది. 'ఇంట్రెస్ట్ ఫ్రీ వర్కింగ్ క్యాపిటల్ అసిస్టెన్స్ స్కీమ్' కింద ప్రతి పొగాకు బార్న్‌కు రూ.50,000 చొప్పున వడ్డీ లేని రుణ సహాయాన్ని ఒకేసారి చెల్లించేందుకు ఆమోదం తెలిపింది. అంతర్జాతీయ మార్కెట్ పరిస్థితులు వేగంగా మారుతున్న నేపథ్యంలో పొగాకు రైతులకు సమయానుకూలంగా ఆర్థికంగా బాసటగా నిలిచేందుకు ఈ నిర్ణయం తీసుకున్నట్లు ప్రభుత్వం ప్రకటించింది. అంతర్జాతీయ మార్కెట్లలో డిమాండ్ అస్థిరత, భౌగోళిక-రాజకీయ పరిణామాలు మరియు అంతర్జాతీయ వాణిజ్య సమీకరణాలు మారడం వల్ల పొగాకు కొనుగోళ్లు, మార్కెటింగ్ సవాళ్లను ఎదుర్కొంటున్నాయి. ఈ క్రమంలో రైతులకు తక్షణ ఆర్థిక ద్రవ్యత అందించేందుకు ఈ ప్యాకేజీని ప్రకటించారు. రాష్ట్రంలో మార్చి 25, 2026 నుంచి ప్రారంభమైన 2025-26 పంట సీజన్ వేలం ప్రక్రియలో ఇప్పటివరకు దాదాపు 100 మిలియన్ కిలోల ఎఫ్‌సివి పొగాకు వేలం పూర్తయింది. కాగా భారత్‌లో ఎఫ్‌సివి పొగాకు అత్యధికంగా ఆంధ్రప్రదేశ్, కర్ణాటక రాష్ట్రాల్లోనే సాగవుతోంది. సుమారు రూ. 220 కోట్ల ఆర్థిక వ్యయం. రాష్ట్రంలోని దాదాపు 44,000 మంది ఎఫ్‌సివి పొగాకు రైతులకు ప్రయోజనం. డైరెక్ట్ బెనిఫిట్ ట్రాన్స్‌ఫర్ ద్వారా నేరుగా రైతుల బ్యాంకు ఖాతాల్లోకి నిధుల జమ. ఈ ఆర్థిక సహాయంతో రైతులు ఇంటి ఖర్చులు, బ్యాంకు రుణాలు చెల్లించడంతో పాటు రాబోయే పంట సీజన్‌కు అవసరమైన ఎరువులు, విత్తనాల కొనుగోలుకు ప్రైవేట్ వడ్డీ వ్యాపారులపై ఆధారపడాల్సిన అవసరం ఉండదు. రైతులకు మద్దతుగా కొనుగోళ్లు వేగవంతం చేయడం, ఎగుమతులను ప్రోత్సహించడం మరియు మార్కెట్ భాగస్వామ్యాన్ని పెంచేందుకు కేంద్రం సమగ్ర చర్యలు చేపడుతోంది. పంట మార్కెటింగ్ సజావుగా సాగేలా ఎగుమతిదారులు, కొనుగోలుదారులు మరియు రైతు ప్రతినిధులతో నిరంతరం చర్చలు జరుపుతున్నట్లు ప్రభుత్వం వెల్లడించింది.