వైట్హౌస్లో ముగిసిన ట్రంప్, షీ జిన్పింగ్ శిఖరాగ్ర సమావేశం
సూర్య అంతర్జాతీయ డెస్క్: అమెరికా అధ్యక్షుడు డోనాల్డ్ ట్రంప్, చైనా అధ్యక్షుడు షీ జిన్పింగ్ మధ్య మూడు రోజుల పాటు సాగిన చారిత్రాత్మక శిఖరాగ్ర సమావేశం ముగిసింది. చివరి రోజు వైట్హౌస్ రెడ్ రూమ్లో ఇరువురు నేతలు కలిసి టీ సేవించిన అనంతరం నేషనల్ ఆర్కైవ్స్ను సందర్శించారు. ఈ భేటీ పెద్ద ఎత్తున ఆర్థిక ఒప్పందాలకు వేదికగా నిలవనప్పటికీ, ఇరు దేశాల మధ్య వ్యక్తిగత దౌత్య సంబంధాలను మరియు వ్యూహాత్మక స్థిరత్వాన్ని బలపరిచేదిగా నిలిచింది.
ఈ భేటీ అనంతరం డోనాల్డ్ ట్రంప్ మాట్లాడుతూ.. ప్రపంచంలోని రెండు అతిపెద్ద ఆర్థిక వ్యవస్థల మధ్య జరిగిన ఈ చర్చలు గొప్ప పురోగతి సాధించాయని, ప్రత్యేకించి ఇరు దేశాల నిర్ణయాల వల్ల అమెరికా రైతులు ఎంతో సంతోషిస్తారని ధీమా వ్యక్తం చేశారు. గౌరవం, న్యాయం, పరస్పర అవగాహన ప్రాతిపదికన యుఎస్-చైనా సంబంధాలు వ్యూహాత్మక స్థిరత్వంతో ము ముందుకు సాగుతున్నాయని చైనా అధ్యక్షుడు షీ జిన్పింగ్ పేర్కొన్నారు. ఈ ఏడాదిలోనే చైనాలో జరిగే ఎపెక్ (APEC) సమ్మిట్ మరియు మైయామీలో జరిగే జి20 (G20) సమ్మిట్లలో తాము మళ్లీ కలవనున్నట్లు వెల్లడించారు.
వాణిజ్య సంబంధాలకు సంబంధించి కుదిరిన పరిమిత ఒప్పందాల వివరాలను సోమవారం విడుదల చేయనున్నట్లు అమెరికా వాణిజ్య ప్రతినిధి జామీసన్ గ్రీర్ తెలిపారు. వ్యవసాయ ఉత్పత్తులు, వైద్య పరికరాల ఎగుమతులు మరియు వినియోగ వస్తువుల దిగుమతులపై పరస్పర సుంకాల్లో కొన్ని మినహాయింపులు ఇవ్వడానికి ఇరు దేశాలు అంగీకరించాయని ఆయన వెల్లడించారు. అలాగే ఆర్టిఫిషియల్ ఇంటెలిజెన్స్ (AI) రంగంలో సహకారంపై ఇరు నేతలు సానుకూలంగా స్పందించారు.
సమావేశం ముగింపులో భాగంగా ఇరు నేతలు నేషనల్ ఆర్కైవ్స్ను సందర్శించి అమెరికా స్వాతంత్ర్య ప్రకటన, రాజ్యాంగం మరియు బిల్ ఆఫ్ రైట్స్ చారిత్రక పత్రాలను పరిశీలించారు. కాగా, ఈ సమావేశంలో తైవాన్ సార్వభౌమాధికార అంశంపై చైనా ప్రత్యేకంగా ఒత్తిడి తెచ్చినట్లు తెలుస్తోంది. తైవాన్ స్వాతంత్ర్యాన్ని అమెరికా పూర్తిగా వ్యతిరేకించాలని, అలాగే తైవాన్కు ఆయుధాల విక్రయాన్ని నిలిపివేయాలని జిన్పింగ్ కోరారు. అయితే, తైవాన్ రక్షణకు కట్టుబడి ఉన్నామని, చైనాతో స్థిరమైన సంబంధాల కోసం ముందడుగు వేస్తున్నామని అమెరికా వర్గాలు స్పష్టం చేశాయి.
