దాడులు ఆగితే నల్లసముద్రంలో 80% ధాన్యం ఎగుమతి టెర్మినళ్లను పునఃప్రారంభించనున్న రష్యా
సూర్య అంతర్జాతీయ డెస్క్: ఉక్రెయిన్ మరియు రష్యాల నడుమ పరస్పర దాడులు నిలిచిపోయి దౌత్యపరమైన చర్చల ద్వారా శత్రుత్వానికి తెరపడితే, నల్లసముద్రం మరియు అజోవ్ సముద్ర ప్రాంతాల్లోని తమ ధాన్యం ఎగుమతి టెర్మినళ్ల సామర్థ్యంలో దాదాపు 80 శాతాన్ని వెంటనే పునఃప్రారంభించేందుకు రష్యా సిద్ధంగా ఉందని పరిశ్రమ విశ్లేషణలు స్పష్టం చేస్తున్నాయి. ఇరు దేశాల మధ్య దాడుల వల్ల గతం కొద్ది నెలలుగా నల్లసముద్రం మార్గంలో నౌకల రాకపోకలు నిలిచిపోయాయి. దీనివల్ల అంతర్జాతీయ మార్కెట్లో ఆహార ధాన్యాల కొరత ఏర్పడి ధరలు గణనీయంగా పెరగడంతో పాటు ప్రపంచవ్యాప్తంగా ఆహార భద్రతపై ఆందోళనలు మళ్లీ మొదలయ్యాయి.
నల్లసముద్రం ద్వారా ధాన్య వ్యాపారాన్ని తిరిగి పునరుద్ధరించేందుకు టర్కీ అధ్యక్షుడు తయ్యిప్ ఎర్డోగాన్ నేతృత్వంలో అంతర్జాతీయ స్థాయిలో తీవ్ర ప్రయత్నాలు జరుగుతున్నాయి. ఈ శాంతి చర్చలు మరియు దౌత్యపరమైన వ్యూహాల్లో భారత్, ఈజిప్ట్ తో పాటు పలు మధ్యప్రాచ్య దేశాలు కూడా క్రియాశీలకంగా భాగస్వామ్యమవుతున్నట్లు ఉక్రెయిన్ అధ్యక్షుడు వ్లాదిమిర్ జెలెన్స్కీ వెల్లడించారు. ఈ దౌత్య సంప్రదింపులను క్రెమ్లిన్ వర్గాలు ధృవీకరిస్తూనే, ప్రస్తుతానికి ఎగుమతుల కోసం రష్యా ప్రత్యామ్నాయ మార్గాలను అన్వేషిస్తోందని స్పష్టం చేశాయి. యుద్దానికి ముందు రష్యా మొత్తం ధాన్యం ఎగుమతుల్లో సుమారు 70 శాతం వరకు ఈ నల్లసముద్రం మార్గం ద్వారానే సాగేది.
ఈ ప్రాంతంలోని రష్యాకు చెందిన తొమ్మిది ప్రధాన టెర్మినళ్లు, అజోవ్ సముద్రం మరియు డాన్ నది ప్రాంతాల్లోని చిన్న సౌకర్యాల పరిస్థితిని విశ్లేషించగా, మొత్తం 67 మిలియన్ టన్నుల సామర్థ్యంలో భద్రతా ముప్పు కారణంగా ప్రస్తుతం 53 మిలియన్ టన్నుల సామర్థ్యం గల టెర్మినళ్లు నిలిచిపోయాయి. దాడులు ఆగితే ఇవన్నీ తక్షణమే సేవలు అందించడానికి సిద్ధంగా ఉన్నాయి. అయితే దాదాపు 20 శాతం సామర్థ్యం కలిగిన మూడు ప్రధాన టెర్మినళ్లు ఉక్రెయిన్ దాడుల్లో తీవ్రంగా దెబ్బతిన్నాయని, వాటిని పునరుద్ధరించడానికి కొన్ని నెలల సమయం పడుతుందని వెల్లడైంది.
నోవోరోసిస్క్ పోర్టులోని ప్రధాన టెర్మినల్ అయిన ఎన్కెహెచ్పి (NKHP) లోని కన్వేయర్ గ్యాలరీ పూర్తిగా కూలిపోవడంతో దాని బాగుచేసేందుకు నాలుగు నుండి ఆరు నెలల సమయం పట్టే అవకాశం ఉంది. అలాగే టామాన్ పోర్టులోని ZTKT టెర్మినల్, తాగన్రోగ్ టెర్మినళ్లు కూడా తీవ్ర నష్టాన్ని చవిచూసి ప్రస్తుతం ఎగుమతులను నిలిపివేశాయి. అయితే నోవోరోసిస్క్లోని కేఎస్కే (KSK), ఎన్జెడ్టి (NZT) టెర్మినళ్లకు అతిస్వల్ప నష్టమే జరగడంతో, దాడులు ఆగిన వెంటనే ఎగుమతి ప్రక్రియను పునఃప్రారంభించేందుకు అవి సిద్ధంగా ఉన్నాయి.
