రాగల మూడు రోజులు వర్షాలు, ఉరుములతో కూడిన ఈదురుగాలులు!

సూర్య జాతీయ డెస్క్: దేశ రాజధాని ఢిల్లీ మరియు దాని పరిసర ప్రాంతాలైన ఎన్‌సీఆర్‌లో శనివారం ఉదయం వాతావరణం ఆహ్లాదకరంగా మారింది. చల్లని ఈదురుగాలులు వీస్తుండటంతో పాటు రాబోయే రెండు మూడు రోజుల పాటు తేలికపాటి నుండి మోస్తరు వర్షాలు కురిసే అవకాశం ఉందని భారత వాతావరణ శాఖ (IMD) వెల్లడించింది. శనివారం ఉరుములు, మెరుపులతో పాటు గంటకు 30 కిలోమీటర్ల వేగంతో గాలులు వీచే అవకాశం ఉండటంతో ఐఎండీ యెల్లో అలర్ట్ జారీ చేసింది.

ఛత్తీస్‌గఢ్, మధ్యప్రదేశ్ మీదుగా ఏర్పడిన తీవ్ర వాయుగుండం ఉత్తరప్రదేశ్ వైపు పయనిస్తూ బలహీనమైన పశ్చిమ భంగం (Western Disturbance)తో తోడవడంతో ఈ వర్షాలు కురుస్తున్నాయి. దీని ప్రభావంతో ఉత్తరాఖండ్, వాయవ్య ఉత్తరప్రదేశ్‌లలో భారీ వర్షాలు కురిసే అవకాశం ఉండగా.. ఢిల్లీ-ఎన్‌సీఆర్, పంజాబ్, హర్యానా, ఉత్తర రాజస్థాన్‌లలో తేలికపాటి జల్లులు పడే అవకాశం ఉంది.

నైరుతి రుతుపవనాలు సెప్టెంబర్ 23నే ఢిల్లీ నుండి ఉపసంహరించుకున్నప్పటికీ, ఈ తాజా వాతావరణ వ్యవస్థల వల్ల రాగల కొన్ని రోజుల పాటు వర్షాలు కొనసాగుతాయని అధికారులు తెలిపారు. శనివారం గరిష్ఠ ఉష్ణోగ్రతలు 32 నుండి 34 డిగ్రీల సెల్సియస్, కనిష్ఠ ఉష్ణోగ్రతలు 22 నుండి 23 డిగ్రీల సెల్సియస్‌గా నమోదయ్యే అవకాశం ఉంది.

మరోవైపు ఉత్తరప్రదేశ్‌లో రాగల రెండు రోజుల పాటు అత్యంత భారీ వర్షాలు కురిసే అవకాశం ఉందని ఐఎండీ 'రెడ్ అలర్ట్' ప్రకటించింది. దీంతో అప్రమత్తమైన రాష్ట్ర ముఖ్యమంత్రి యోగి ఆద్యిత్యనాథ్.. క్షేత్రస్థాయికి వెళ్లి సహాయక చర్యలను, ఏర్పాట్లను నిరంతరం పర్యవేక్షించాలని అన్ని జిల్లాల కలెక్టర్లను ఆదేశించారు.