అగ్నిప్రమాదాల నివారణే లక్ష్యం.. ప్రాణరక్షణే ప్రథమ కర్తవ్యం!

పూసపాటిరేగ, సూర్య :  అగ్నిప్రమాదాలు సంభవించినప్పుడు అప్రమత్తత, సమయస్ఫూర్తి, సరైన అవగాహనతో విలువైన ప్రాణాలను కాపాడవచ్చని పూసపాటిరేగ ప్రాథమిక ఆరోగ్య కేంద్రం వైద్యాధికారి డాక్టర్ ఎస్. ప్రమీలాదేవి పేర్కొన్నారు.  ఆసుపత్రుల్లో రోగులు, వైద్య సిబ్బంది భద్రతను దృష్టిలో ఉంచుకుని అగ్నిప్రమాదాల నివారణ, ప్రాథమిక అగ్నిమాపక చర్యలు, ఫస్ట్ ఎయిడ్‌పై ప్రత్యేక అవగాహన కార్యక్రమాన్ని ప్రమీల దేవి ఆధ్వర్యంలో శనివారం నిర్వహించారు.
అగ్నిమాపక పరికరాల వినియోగంపై  ప్రత్యక్ష అవగాహన
ప్రాథమిక ఆరోగ్య కేంద్రాలకు అందించిన ఫైర్ ఎక్స్‌టింగ్విషర్లను అత్యవసర సమయాల్లో ఎలా ఉపయోగించాలి, మంటలు ప్రారంభమైన వెంటనే ఎలాంటి చర్యలు తీసుకోవాలి, అగ్నిప్రమాద సమయంలో రోగులను, ముఖ్యంగా నడవలేని రోగులను, సురక్షిత ప్రాంతాలకు ఎలా తరలించాలి అనే అంశాలను అగ్నిమాపక శాఖ సిబ్బంది రాజేష్, దుర్గారావు వివరించారు. ఫైర్ ఎక్స్‌టింగ్విషర్ వినియోగంపై ప్రాక్టికల్ అవగాహన కల్పిస్తూ సిబ్బందికి అవసరమైన సూచనలు అందించారు.
ప్రాణరక్షణలో ప్రతి క్షణం కీలకం అగ్నిప్రమాదం జరిగినప్పుడు భయాందోళనలకు గురికాకుండా ప్రశాంతంగా వ్యవహరించడం, ప్రమాద హెచ్చరికలను గుర్తించడం, అత్యవసర మార్గాలను ఖాళీగా ఉంచడం, సురక్షితమైన పరిస్థితుల్లో విద్యుత్ సరఫరాను నిలిపివేయడం, మంటలు అదుపులోకి రాకపోతే వెంటనే అందరినీ సురక్షిత ప్రాంతాలకు తరలించడం వంటి అంశాలపై అవగాహన కల్పించారు. పొగ పీల్చడం వల్ల కలిగే ప్రమాదాలు, అగ్నిప్రమాదంలో గాయపడిన వారికి అందించాల్సిన ప్రాథమిక చికిత్స, అత్యవసర సేవలను సంప్రదించాల్సిన అవసరాన్ని వివరించారు.
ప్రతి ఆరోగ్య కేంద్రంలో భద్రతా సంస్కృతి
ఆసుపత్రుల్లో అగ్నిప్రమాదాల నివారణకు ముందస్తు జాగ్రత్తలు తీసుకోవడం ప్రతి ఒక్కరి బాధ్యత అని వైద్యాధికారి సూచించారు. అగ్నిమాపక పరికరాలు అందుబాటులో ఉండటమే కాకుండా, వాటిని ఉపయోగించే విధానంపై సిబ్బందికి అవగాహన ఉండటం అత్యంత ముఖ్యమని పేర్కొన్నారు. వైద్య సేవలతో పాటు రోగుల ప్రాణరక్షణ, సిబ్బంది భద్రతకు సమాన ప్రాధాన్యత ఇవ్వాలని తెలిపారు. ఈ తరహా అవగాహన కార్యక్రమాల ద్వారా ప్రతి ప్రాథమిక ఆరోగ్య కేంద్రంలో అత్యవసర పరిస్థితులను సమర్థవంతంగా ఎదుర్కొనే సామర్థ్యాన్ని పెంపొందించడమే లక్ష్యమని పేర్కొన్నారు.
ఈ కార్యక్రమంలో కమ్యూనిటీ హెల్త్ ఆఫీసర్లు వేదమణి, హెల్త్ సూపర్వైజర్లు నానమ్మ ఉమాపతి, కమ్యూనిటీ హెల్త్ ఆఫీసర్లు పూర్ణిమ, సంతోషి, సింహాచలం, ఆరోగ్య సహాయకులు ఆర్.వి. రమణ, ల్యాబ్ టెక్నీషియన్ ఆదిలక్ష్మి, కృష్ణ, దుర్గ, 108 అత్యవసర ఆరోగ్య సేవల సిబ్బంది రవి, చక్రధర్ తదితరులు పాల్గొన్నారు.

రిపోర్టర్ : రమేష్, పూసపాటిరేగ, విజయనగరం జిల్లా.