ఆత్మకూరులో ప్రజల నుంచి విశేష స్పందన - 28 వార్డుల్లో కూటమి అభ్యర్థుల విజయం ఖాయం - మంత్రి ఆనం

ఆత్మకూరు, మేజర్ న్యూస్  :    ఆత్మకూరు మున్సిపాలిటీ పరిధిలో జరుగుతున్న ఎన్నికల పోలింగ్ సరళిని ఆదివారం రాష్ట్ర దేవాదాయ శాఖ మంత్రి ఆనం రామనారాయణ రెడ్డి పరిశీలించారు. కూటమి నాయకులతో కలిసి పట్టణంలోని పలు వార్డుల్లో పోలింగ్ కేంద్రాలను సందర్శించి ఓటింగ్ ప్రక్రియను సమీక్షించారు.  దాదాపు 70 శాతం పోలింగ్ కేంద్రాలను సందర్శించినట్లు ఆయన వెల్లడించారు.
అనంతరం మీడియాతో మాట్లాడిన మంత్రి ఆనం రామనారాయణ రెడ్డి ఆత్మకూరు పట్టణంలో ఎక్కడ చూసినా ప్రజల నుంచి విశేష స్పందన కనిపిస్తోందని తెలిపారు. మున్సిపల్ ఛైర్‌పర్సన్‌తో పాటు వార్డు కౌన్సిలర్లను గెలిపించేందుకు ప్రజలు స్వచ్ఛందంగా ముందుకు వచ్చి ఓటు హక్కును వినియోగించుకుంటున్నారని పేర్కొన్నారు.ఆత్మకూరు మున్సిపాలిటీలోని మొత్తం 28 వార్డుల్లో మున్సిపల్ ఛైర్‌పర్సన్‌తో సహా ఎన్డీయే కూటమి అభ్యర్థులు అత్యధిక మెజారిటీతో విజయం సాధిస్తారని మంత్రి ధీమా వ్యక్తం చేశారు.
తెలుగుదేశం, జనసేన, బీజేపీ నాయకులు ప్రజల మనోభావాలకు అనుగుణంగా ఐక్యంగా పనిచేస్తున్నారని తెలిపారు. 1, 6వ వార్డుల్లో టీడీపీ, జనసేన కలిసి పనిచేస్తుండగా, 3వ వార్డును బీజేపీకి కేటాయించినట్లు వివరించారు. కౌన్సిలర్‌గా బీజేపీకి, ఛైర్‌పర్సన్‌గా టీడీపీకి ఓటు వేస్తూ ప్రజలు కూటమికి మద్దతు తెలుపుతున్నారని చెప్పారు.మిగిలిన పోలింగ్ కేంద్రాలను కూడా సందర్శించి పరిస్థితిని సమీక్షిస్తామని మంత్రి తెలిపారు. ఆత్మకూరు మున్సిపాలిటీలో ఎన్డీయే కూటమి అభ్యర్థులకు ప్రజల నుంచి మంచి స్పందన లభిస్తోందని ఆయన పేర్కొన్నారు.