ఆత్మకూరు మున్సిపాలిటీలో నేటి నుండి నామినేషన్ల స్వీకరణ

ఆత్మకూరు,మేజర్ న్యూస్ :    ఆత్మకూరు మున్సిపాలిటీకి జరగనున్న ఎన్నికల్లో పోటీ చేసే అభ్యర్థులు శుక్రవారం నుండి నామినేషన్లు దాఖలు చేసేలా ఎన్నికల కమిషన్, రాష్ట్ర ప్రభుత్వం నోటిఫికేషన్ లో పేర్కొన్నారు. బుధవారం నోటిఫికేషన్ విడుదలైన విషయం తెలిసిందే.ఈనెల 16, 17, 18 తేదీల్లో అభ్యర్థులు నామినేషన్లు స్థానిక మున్సిపల్ కార్యాలయంలోని ఎలక్షన్ ఆఫీసర్ కు దాఖలు చేయాల్సి ఉంది.నామినేషన్ల పరిశీలన ఈ నెల 19వ తేదీన జరగనుండగా ఈనెల 21వ తేదీన ఉపసంహరణల కార్యక్రమం ఉంటుంది. ఈనెల 28వ తేదీ పోలింగ్ జరగనుండగా ఈనెల 30వ తేదీ ఓట్ల లెక్కింపు, ఫలితాలు వెల్లడి జరుగుతుంది. అవసరమైతే రీపోలింగ్ ఈనెల 29వ తేదీన నిర్వహించేలా నిర్ణయించారు. మున్సిపల్ పరిధిలో 28 వార్డులు ఉండగా మొత్తం ఓటర్లు 26,529 మంది కాగా పురుష ఓటర్లు 12654 మంది, మహిళా ఓటర్లు 13,875 మంది ఉన్నారు. ఎన్నికల కోడ్ అమలులోకి రావడంతో స్థానిక మున్సిపల్ కమిషనర్ సి. గంగాప్రసాద్ పట్టణంలో ఎక్కడ ఫ్లెక్సీలు లేకుండా తొలగించడంతోపాటు విగ్రహాలకు కూడా ముసుగులు వేసి అన్ని చర్యలు చేపట్టారు.