ఆశా వర్కర్ల సమస్యలు పరిష్కరించాలి

మెలియాపుట్టి: ఆశా వర్కర్ల సమస్యలను ప్రభుత్వం తక్షణమే పరిష్కరించాలని సీఐటీయూ నాయకులు డిమాండ్‌ చేశారు. ఈ మేరకు మంగళవారం ఎమ్మెల్యే మామిడి గోవిందరావుకు వినతిపత్రం అందజేశారు. సీఐటీయూ జిల్లా కమిటీ సభ్యులు పనస రమేష్‌, ఎస్‌.గౌరమ్మ, పల్ల క్రిష్ణ మాట్లాడుతూ.. ఆశాలకు కనీస వేతనం అమలు చేసి పర్మినెంట్‌ ఉద్యోగులుగా గుర్తించాలని కోరారు. ఉద్యోగ భద్రతతో పాటు ఈఎస్‌ఐ, జీపీఎఫ్‌ వంటి సంక్షేమ పథకాలు అమలు చేయాలని, పెరుగుతున్న ధరలకు అనుగుణంగా వేతనాలు పెంచాలని డిమాండ్‌ చేశారు.గర్భిణులు, చిన్నారుల సంరక్షణ, టీకాలు, వ్యాధుల నివారణలో ఆశాలు సుమారు 20 ఏళ్లుగా సేవలందిస్తున్నారని తెలిపారు. కోవిడ్‌ సమయంలోనూ ప్రాణాలకు తెగించి విధులు నిర్వహించారని పేర్కొన్నారు. ఆశాలకు అన్ని రకాల సెలవులు మంజూరు చేయాలని, ఖాళీలను భర్తీ చేయాలని, ప్రతి వెయ్యి మంది జనాభాకు ఒక ఆశా వర్కర్‌ను నియమించాలని కోరారు. రూ.10 లక్షల బీమా, నాణ్యమైన యూనిఫాం, పని సామగ్రి అందించాలని విజ్ఞప్తి చేశారు. కార్యక్రమంలో శిల్లా భవాని, స్వర్ణలతా పట్నాయక్‌, పి.జయలక్ష్మి, పావని, జ్యోతి తదితరులు పాల్గొన్నారు.