ఆరోగ్యకర సమాజమే లక్ష్యం

పామూరు, మేజర్ న్యూస్ : 

పోషకాహార లోపాన్ని నివారించి ఆరోగ్యకరమైన సమాజాన్ని నిర్మిద్దాం అని ఐసీడీఎస్‌ సూపర్‌వైజర్‌ ఎంవీఎస్‌ పార్వతి అన్నారు. మండలంలోని నిమ్మచెట్లపల్లి అంగన్వాడీ కేంద్రంలో ఆదివారం 9వ జాతీయ పోషణ మాసంలో భాగంగా మన అంగన్వాడీ-మన బాధ్యత స్ఫూర్తితో అంగన్వాడీ ఉత్సవం నిర్వహించారు. సెప్టెంబర్‌ 25 నుంచి అక్టోబర్‌ 7 వరకు ప్రతి అంగన్వాడీ కేంద్రంలో మూడు రోజుల పాటు ఉత్సవాలు నిర్వహిస్తున్నట్లు పార్వతి తెలిపారు. స్థానికంగా లభించే చిరుధాన్యాలు, పప్పుధాన్యాలు, ఆకుకూరలు, కూరగాయలు, పండ్లు, గుడ్లు, పాలను ఆహారంలో చేర్చుకోవాలని సూచించారు. మాతృ సంరక్షణ, వ్యాక్సినేషన్‌, ఈసీసీఈ విద్య, పీఎంఎంవై, మిషన్‌ వాత్సల్య పథకాలపై అవగాహన కల్పించారు. అనంతరం పోషణ మాసం ప్రతిజ్ఞ చేయించి గ్రామంలో అవగాహన ర్యాలీ నిర్వహించారు. కార్యక్రమంలో అంగన్వాడీ కార్యకర్తలు ఈశ్వరమ్మ, కళ్యాణి, రామాంజమ్మ, హెల్పర్లు త్రివేణి, లక్ష్మీకుమారి, సుశీలతో పాటు గర్భిణులు, బాలింతలు, కిశోర బాలికలు, చిన్నారులు పాల్గొన్నారు.