ఆరోగ్య శాఖ ఉద్యోగుల సమస్యలు పరిష్కరించడంలో అధికారుల నిర్లక్ష్యం

పెండింగ్ సమస్యలపై రాష్ట్ర అధ్యక్షుడు ఆస్కార్ రావు ఆగ్రహం

చిత్తూరు ప్రతినిధి, మేజర్ న్యూస్:వైద్య, ఆరోగ్య శాఖ ఉద్యోగుల సమస్యలను పరిష్కరించడంలో అధికారులు నిర్లక్ష్యంగా వ్యవహరిస్తున్నారని పబ్లిక్ హెల్త్ మెడికల్ ఎంప్లాయీస్ యూనియన్ రాష్ట్ర అధ్యక్షుడు జి. ఆస్కార్ రావు విమర్శించారు. ఉద్యోగుల సమస్యలు అధికారులకు అలుసుగా మారాయా అని ప్రశ్నించారు.చిత్తూరు లోని ఎల్.జి.బి. టవర్స్‌లో జిల్లా అధ్యక్షుడు ఎ. లక్ష్మీనారాయణ అధ్యక్షతన నిర్వహించిన జిల్లా కార్యవర్గ సమావేశానికి ఆయన ముఖ్య అతిథిగా హాజరయ్యారు. ఈ సందర్భంగా కాంట్రాక్ట్ ఉద్యోగుల క్రమబద్ధీకరణ, సమాన పనికి సమాన వేతనం, రెండో ఏఎన్‌ఎంలకు జీతాల పెంపు, ఖాళీల భర్తీ, మొబైల్ యాప్‌ల పనిభారం తగ్గింపు తదితర సమస్యలను ప్రభుత్వం వెంటనే పరిష్కరించాలని డిమాండ్ చేశారు.

గతంలో ఉన్నతాధికారులతో సుమారు 30 సమస్యలపై చర్చించినప్పటికీ ఇప్పటివరకు ఎలాంటి ఉత్తర్వులు వెలువడలేదని అసంతృప్తి వ్యక్తం చేశారు. గుర్తింపు పొందిన ఉద్యోగ సంఘాలతో సమావేశాలు నిర్వహించి సమస్యలను పరిష్కరించాలని తీర్మానించారు. కాంట్రాక్ట్ ఉద్యోగులకు ఉద్యోగ భద్రత, బదిలీ సౌకర్యం కల్పించాలని, అర్హులైన ఉద్యోగులను క్రమబద్ధీకరించాలని, ఖాళీలను పదోన్నతుల ద్వారా భర్తీ చేయాలని కోరారు.

జిల్లా నూతన కార్యవర్గం ఎన్నిక

సమావేశంలో యూనియన్ చిత్తూరు జిల్లా నూతన కార్యవర్గాన్ని ఏకగ్రీవంగా ఎన్నుకున్నారు. అధ్యక్షుడిగా ఎ. లక్ష్మీనారాయణ, వర్కింగ్ ప్రెసిడెంట్‌గా బి. శ్రీనివాస్ మూర్తి, కార్యదర్శిగా కె.ఆర్. జ్ఞానశేఖర్, అసోసియేట్ ప్రెసిడెంట్‌గా కె. భానుప్రకాష్, కోశాధికారిగా జె. చంద్రశేఖర్ ఎన్నికయ్యారు. మోహన్ శెట్టి, తాష్కెంట్, విజయ్, సతీష్, సురేష్, అమ్ములు, విజయం తదితరులు సభ్యులుగా ఎన్నికయ్యారు.ఈ సమావేశంలో ఉద్యోగ వేదిక సెక్రటరీ జనరల్ శ్రీకాంత్ రాజు, రాష్ట్ర కార్యనిర్వాహక అధ్యక్షుడు రమణ, రాష్ట్ర కోశాధికారి బాబాసాహెబ్, జోనల్ అధ్యక్షుడు శ్రీనివాస్ మూర్తి, వివిధ తాలూకాల ప్రతినిధులు, మహిళా ఉద్యోగులు పాల్గొన్నారు.

ఉమాశంకర్ చిత్తూరు స్టాఫ్ రిపోర్టర్.