14 కళాశాలల జట్లతో మహిళల కబడ్డీ పోటీలు ప్రారంభం
నరసరావుపేట : కేసనపల్లిలోని ఎంఏఎం కాలేజ్ ఆఫ్ ఫార్మసీ ప్రాంగణంలో ఆచార్య నాగార్జున విశ్వవిద్యాలయం అంతర్ కళాశాలల మహిళల కబడ్డీ టోర్నమెంట్ శుక్రవారం అట్టహాసంగా ప్రారంభమైంది. విశ్వవిద్యా లయ అనుబంధ కళాశాలలకు చెందిన 14 జట్లు ఈ పోటీల్లో పాల్గొంటున్నాయి. నాకౌట్ కమ్ లీగ్ పద్ధతిలో పోటీలు హోరాహోరీగా సాగుతున్నాయి. టోర్నమెంట్ ప్రారంభోత్స వానికి ముఖ్య అతిథిగా హాజరైన నాగోతు సబిత (డైరెక్టర్, ఇంటర్నేషనల్ ఢిల్లీ పబ్లిక్ స్కూల్) క్రీడాకారిణులను ఉత్సాహపరిచారు. ఎంఏఎం విద్యాసంస్థల చైర్మన్ మేదరమెట్ల రామశేషగిరిరావు అధ్యక్షత వహించి పోటీల నిర్వహణకు అవసరమైన ఏర్పాట్లను పర్యవేక్షించారు. ఈ సందర్భంగా ఎంఏఎం కాలేజ్ ఆఫ్ ఫార్మసీ ప్రిన్సిపాల్ డాక్టర్ మంచినేని ప్రసాదరావు మాట్లాడుతూ విద్యార్థినులకు చదువుతోపాటు క్రీడలు, ఇతర పాఠ్యేతర కార్యక్రమాలు ఎంతో అవసరమన్నారు. ఇలాంటి పోటీల్లో పాల్గొనడం ద్వారా విద్యార్థుల్లో క్రీడా స్ఫూర్తి, నాయకత్వ లక్షణాలు పెంపొందుతా యని, తద్వారా వారి సమగ్ర అభివృద్ధికి దోహదపడుతుందని పేర్కొన్నారు. క్రీడాకారిణుల ప్రతిభను పరిశీలించి జట్ల ఎంపిక ప్రక్రియను నిర్వహించేందుకు సెలక్షన్ కమిటీ సభ్యులుగా ముప్పాళ్ల ధనలక్ష్మి వ్యాయామ కళాశాల ప్రిన్సిపాల్ డాక్టర్ చుండు వెంకటరావు, తెనాలి జేఎంజే మహిళా కళాశాల ఫిజికల్ ఎడ్యుకేషన్ లెక్చరర్ డాక్టర్ కె. అరుణ సుజాత వ్యవహరిస్తున్నారు. కార్యక్రమంలో క్రీడాకారిణులు, అధ్యాపకులు, నిర్వాహకులు, విద్యార్థినులు పెద్ద సంఖ్యలో పాల్గొన్నారు.
మల్లికార్జునరావు పల్నాడు జిల్లా ఇన్చార్జి..