109వ డివిజన్లో వైసీపీ నుంచి జనసేనలోకి 200 మంది కార్యకర్తల చేరిక
అనకాపల్లి, జీవీఎంసీ స్థానిక ఎన్నికల నేపథ్యంలో అనకాపల్లి 109వ డివిజన్ రామనాయుడు కాలనీకి చెందిన సుమారు 200 మంది వైసీపీ కార్యకర్తలు ప్రముఖ వైద్యులు, మాజీ వైసీపీ నాయకుడు బొడ్డెడ లక్ష్మీనరసింహ ఆధ్వర్యంలో జనసేన పార్టీలో చేరారు. అనకాపల్లి జనసేన పార్టీ ఇన్‌చార్జి భీమరశెట్టి రామ్కీ సమక్షంలో, సినీ నటుడు హైపర్ ఆది చేతుల మీదుగా వీరు పార్టీ కండువాలు కప్పుకున్నారు.ఈ సందర్భంగా రామ్కీ మాట్లాడుతూ, రాష్ట్రంలో కూటమి ప్రభుత్వం చేపడుతున్న అభివృద్ధి కార్యక్రమాలతో పాటు, అనకాపల్లి అభివృద్ధికి ఎమ్మెల్యే కొణతాల రామకృష్ణ చేస్తున్న కృషికి ఆకర్షితులై పలువురు జనసేనలో చేరుతున్నారని తెలిపారు. సినీ నటుడు హైపర్ ఆది మాట్లాడుతూ, 2024 ఎన్నికల సమయంలో పిఠాపురం తర్వాత తాను ప్రచారం చేసిన అనకాపల్లి నియోజకవర్గంలో కొణతాల రామకృష్ణ నాయకత్వంలో జరుగుతున్న అభివృద్ధి గురించి ప్రజలు ప్రస్తావిస్తున్నారని అన్నారు. రాష్ట్రంతో పాటు అనకాపల్లి అభివృద్ధి చెందేందుకు కూటమి ప్రభుత్వం చేస్తున్న కృషిని ప్రజలు గుర్తిస్తున్నారని తెలిపారు.
బొడ్డెడ లక్ష్మీనరసింహ మాట్లాడుతూ, గత వైసీపీ ప్రభుత్వ విధానాలపై విమర్శలు చేశారు. కొణతాల రామకృష్ణ నాయకత్వంలో, జనసేన పార్టీ ఇన్‌చార్జి రామ్కీ సారథ్యంలో అనకాపల్లిలో జనసేన, కూటమి బలోపేతానికి కృషి చేస్తానని చెప్పారు. రానున్న జీవీఎంసీ ఎన్నికల్లో 19వ డివిజన్లో పోటీ చేస్తున్న టీడీపీ, బీజేపీ బలపరిచిన జనసేన అభ్యర్థి బుద్ధ జ్యోతి శ్రీనివాస్‌ కు మద్దతుగా పనిచేస్తానని తెలిపారు.ఈ కార్యక్రమంలో నూకాంబిక అమ్మవారి దేవస్థానం మాజీ చైర్మన్ కొణతాల మురళీకృష్ణ, 109వ డివిజన్ జనసేన నాయకుడు కాండ్రేగుల శ్రీరామ్, రాష్ట్ర గవర కార్పొరేషన్ డైరెక్టర్ విల్లూరి హరికృష్ణతో పాటు పలువురు జనసేన నాయకులు, కార్యకర్తలు పాల్గొన్నారు.
