విషాద ఘటనలో మృతి చెందిన కుటుంబ సభ్యులను పరామర్శించిన ఎమ్మెల్యే సంజీవరెడ్డి

నారాయణఖేడ్ ; నారాయణఖేడ్ నియోజకవర్గం మనూర్ మండల కేంద్రంలో గత కొద్ది రోజుల క్రితం తీవ్ర విషాద ఘటన చోటుచేసుకుంది. గ్రామ శివారులోని చెరువుకు బట్టలు ఉతకడానికి వెళ్లిన ఒకే కుటుంబానికి చెందిన నరసింహారెడ్డి, అతని భార్య కృష్ణవేణి, అతని సోదరుడు సంగమేశ్వర్ రెడ్డి ప్రమాదవశాత్తు నీటిలో పడి మృతి చెందారు. ఈ దుర్ఘటనతో ఆ కుటుంబం తీవ్ర దుఃఖంలోకి నెట్టుకుపోయింది. ఈ సందర్భంగా గురువారం నారాయణఖేడ్ శాసనసభ్యులు డాక్టర్ పట్లోళ్ల సంజీవరెడ్డి మృతుల నివాసానికి వెళ్లి, వారి కుమారుడు హర్షవర్ధన్ రెడ్డితో పాటు కుటుంబ సభ్యులను పరామర్శించారు. ఘటన జరిగిన విధానం, మృతికి దారితీసిన కారణాల గురించి కుటుంబ సభ్యుల నుంచి వివరాలు తెలుసుకున్నారు. ఒకే కుటుంబంలో ముగ్గురు మృతి చెందడం అత్యంత దుఃఖకరమని, ఈ ఘటనపై తాను తీవ్ర దిగ్భ్రాంతికి గురయ్యానని ఎమ్మెల్యే తెలిపారు. మృతుల కుటుంబానికి ప్రభుత్వం అండగా ఉంటుందని ఎమ్మెల్యే సంజీవరెడ్డి హామీ ఇచ్చారు. కుటుంబానికి అవసరమైన ఆర్థిక సహాయం, ప్రభుత్వ సంక్షేమ పథకాల అమలు వంటి అంశాలపై అవగాహన కల్పించి, అవసరమైన చర్యలు తీసుకోవాలని అధికారులకు సూచనలు ఇచ్చారు. భవిష్యత్తులో ఇలాంటి ప్రమాదాలు జరగకుండా చెరువుల వద్ద భద్రతా చర్యలు, ప్రజలకు అప్రమత్తత తప్పనిసరని కూడా వెల్లడించారు. వారి వెంట ఆత్మ చైర్మన్ వినోద్ పాటిల్, మున్సిపల్ వైస్ చైర్మన్ దారం శంకర్ సెట్, నారాయణఖేడ్ నియోజకవర్గం యూత్ కాంగ్రెస్ అధ్యక్షులు సిద్ధ రెడ్డి, రాఘవ చారి కాంగ్రెస్ నాయకులు, పండరి రెడ్డి మున్సిపల్ కాంగ్రెస్ పార్టీ అధ్యక్షులు, సంగారెడ్డి రెడ్డి సర్పంచ్, మానూర్ గ్రామ ప్రజలు కాంగ్రెస్ నాయకులు  తదితరులు పాల్గొన్నారు

ఎం సంతోష్ నిజాంపేట్ మండల రిపోర్టర్…