వికారాబాద్‌లో నూతన కోర్టుల భవన సముదాయానికి శంకుస్థాపన
వికారాబాద్ జిల్లా ప్రతినిధి, మేజర్ న్యూస్ : న్యాయవ్యవస్థను ప్రజలకు మరింత చేరువ చేయడంతో పాటు బాధితులకు సత్వర న్యాయం అందించడమే లక్ష్యంగా వికారాబాద్‌లో నూతనంగా నిర్మించనున్న 10+2 కోర్టుల భవన సముదాయానికి శనివారం భూమిపూజ, శంకుస్థాపన నిర్వహించారు. తెలంగాణ రాష్ట్ర హైకోర్టు న్యాయమూర్తి, వికారాబాద్ జిల్లా పరిపాలనా న్యాయమూర్తి జస్టిస్ రేణుక యార ముఖ్య అతిథిగా హాజరై, హైకోర్టు న్యాయమూర్తులు జస్టిస్ కె. లక్ష్మణ్, జస్టిస్ బి. విజయసేన్ రెడ్డి, జస్టిస్ నర్సింగ్ రావు నందికొండలతో కలిసి శంకుస్థాపన చేశారు.ఈ సందర్భంగా న్యాయమూర్తులకు మేళతాళాలు, మంగళవాయిద్యాలు, పూర్ణకుంభంతో ఘనస్వాగతం పలికారు. అటవీ వసతి గృహం వద్ద న్యాయమూర్తులు పోలీసుల గౌరవ వందనం స్వీకరించారు. జిల్లా కలెక్టర్ దీపక్ తివారీ, జిల్లా ఎస్పీ స్నేహ మెహ్రా పుష్పగుచ్ఛాలు అందించి స్వాగతం పలికారు.అనంతరం ఏర్పాటు చేసిన సభలో న్యాయమూర్తులు మాట్లాడుతూ… జిల్లాలో నూతన కోర్టుల ఏర్పాటు న్యాయవ్యవస్థను ప్రజలకు మరింత చేరువ చేయడంలో కీలక ముందడుగని పేర్కొన్నారు. న్యాయస్థానాల్లో రోజురోజుకూ కేసుల సంఖ్య పెరుగుతోందని, వాటి తగ్గింపునకు ప్రతి ఒక్కరూ కృషి చేయాలని సూచించారు. ముఖ్యంగా భూ వివాదాలకు సంబంధించిన కేసుల పరిష్కారానికి మీడియేషన్ చట్టంపై ప్రజలకు అవగాహన కల్పించాలని, మధ్యవర్తిత్వం ద్వారా వివాదాలను త్వరితగతిన పరిష్కరించేలా చర్యలు తీసుకోవాలని తెలిపారు. కోర్టుల్లో మెరుగైన మౌలిక సదుపాయాలు కల్పించడం ఎంతో అవసరమన్నారు.జిల్లాలో పోక్సో న్యాయస్థానం ఏర్పాటు కావడంతో బాలలపై జరిగే లైంగిక నేరాలకు సంబంధించిన కేసుల విచారణ మరింత వేగవంతం అవుతుందని తెలిపారు. కుటుంబ న్యాయస్థానం అందుబాటులోకి రావడంతో కుటుంబ వివాదాలను సామరస్యపూర్వకంగా పరిష్కరించేందుకు మెరుగైన న్యాయసేవలు ప్రజలకు అందుబాటులోకి వస్తాయని పేర్కొన్నారు.ఈ కార్యక్రమంలో జిల్లా ప్రిన్సిపల్ సెషన్స్ న్యాయమూర్తి లాల్‌సింగ్ శ్రీనివాస నాయక్, హైకోర్టు బార్ అసోసియేషన్ సభ్యులు అనంతసేనా రెడ్డి, ఆకుల మహేష్ కుమార్, జిల్లా బార్ అసోసియేషన్ అధ్యక్షుడు జి. లవకుమార్, కార్యదర్శి పి. వెంకట్ రెడ్డి, మాజీ అధ్యక్షుడు మాధవరెడ్డి, సీనియర్ న్యాయవాది యాదవరెడ్డి, ఆర్డీఓ వాసుచంద్ర, మున్సిపల్ కమిషనర్ విక్రమ్ సింహారెడ్డి, వివిధ కోర్టుల బార్ అసోసియేషన్ ప్రతినిధులు, న్యాయవాదులు, న్యాయశాఖ సిబ్బంది తదితరులు పాల్గొన్నారు.
