telangana
తిర్యాణిలో ఇందిరాగాంధీ జయంతి వేడుకలు
సూర్య తిర్యాణి : మాజీ ప్రధాని ఇందిరాగాంధీ 109వ జయంతిని గురువారం తిర్యాణి మండల కాంగ్రెస్ పార్టీ ఆధ్వర్యంలో ఘనంగా నిర్వహించారు. మార్కెట్ డైరెక్టర్, జవహర్ బాల్ మంచ్ కుమురం భీమ్ ఆసిఫాబాద్ జిల్లా చైర్మన్ నైతం రాంచందర్ స్వగృహంలో ఏర్పాటు చేసిన కార్యక్రమంలో నాయకులు, కార్యకర్తలు ఇందిరాగాంధీ చిత్రపటానికి పూలమాలలు వేసి నివాళులర్పించారు. కొబ్బరికాయ కొట్టి, స్వీట్లు పంపిణీ చేశారు. అనంతరం తిర్యాణి ప్రభుత్వ ఆసుపత్రిలో చికిత్స పొందుతున్న రోగులకు పండ్లు అందించి, వారి ఆరోగ్య పరిస్థితిని అడిగి తెలుసుకున్నారు.ఈ సందర్భంగా మండల కాంగ్రెస్ పార్టీ అధ్యక్షుడు కొట్నాక గణపతి మాట్లాడుతూ దేశ ఐక్యత, సమగ్రత కోసం ఇందిరాగాంధీ చేసిన కృషి చిరస్మరణీయమన్నారు. పేదరిక నిర్మూలనకు చేపట్టిన చర్యలు, బ్యాంకుల జాతీయీకరణ వంటి నిర్ణయాలు సామాన్య ప్రజల జీవితాల్లో మార్పునకు దోహదపడ్డాయని పేర్కొన్నారు. ఆమె ధైర్యం, నాయకత్వాన్ని ఆదర్శంగా తీసుకోవాలని పిలుపునిచ్చారు.నైతం రాంచందర్ మాట్లాడుతూ బడుగు, బలహీన వర్గాల సంక్షేమానికి ఇందిరాగాంధీ చేసిన సేవలను మరువలేమన్నారు. ఆమె ఆశయాలకు అనుగుణంగా నాయకులు, కార్యకర్తలు ప్రజలకు అందుబాటులో ఉంటూ సేవా కార్యక్రమాలు చేపట్టాలని సూచించారు.కార్యక్రమంలో డీసీసీ ప్రధాన కార్యదర్శి బుద్దె విజయ్, ఎస్సీ సెల్ జిల్లా ఉపాధ్యక్షుడు పులి కొమురయ్య, మాజీ మండల అధ్యక్షుడు అంకం గౌరయ్య, మండల పార్టీ ఉపాధ్యక్షులు ఆత్రం లక్ష్మణ్, చుంచు బాపురావు, ప్రధాన కార్యదర్శులు రాయిసిడం గొర్యకుమార్, దుర్గం పవన్ కుమార్, పార్టీ అధికార ప్రతినిధి కూన సురేష్, ఎస్టీ సెల్ మండల నాయకుడు జూగ్నక మారుతీ, ఎస్సీ సెల్ మండల నాయకుడు మల్యాల అశోక్, కిసాన్ సెల్ మండల నాయకుడు దూస మధుకర్, సేవాదళ్ మండల నాయకుడు బోరక్కడే శంకర్, తలండి సర్పంచ్ నైతం మంగు, మండల పార్టీ కార్యదర్శులు పూసం రాజు, కోవ శంకర్, బుద్దె బనయ్య, నాయకులు సిడం జలపతిరావు, మాడవి సాగర్, రొంపల్లి గ్రామపంచాయతీ కమిటీ ప్రధాన కార్యదర్శి పంద్రం యశ్వంత్ రావు, ఆత్రం దౌలత్ రావు తదితరులు పాల్గొన్నారు.