తహసీల్దార్ కార్యాలయంలో జీపీఓకు పాము కాటు

సూర్య, పెంచికల్‌పేట్: పెంచికల్‌పేట్ తహసీల్దార్ కార్యాలయంలో జీపీఓగా విధులు నిర్వహిస్తున్న పద్మ సోమవారం పాముకాటుకు గురయ్యారు. కార్యాలయంలో విధులు నిర్వహిస్తున్న సమయంలో ఈ ఘటన చోటుచేసుకుంది. వెంటనే ఆమెను పెంచికల్‌పేట్ ప్రాథమిక ఆరోగ్య కేంద్రానికి తరలించగా, వైద్యులు ప్రాథమిక చికిత్సతో పాటు యాంటీ స్నేక్ వెనమ్ ఇంజెక్షన్ అందించారు. అనంతరం మెరుగైన వైద్యం కోసం అంబులెన్స్‌లో కాగజ్‌నగర్ ఆసుపత్రికి తరలించారు.ఈ ఘటనపై తహసీల్దార్ బోడ రవీందర్‌ను వివరణ కోరగా, జీపీఓ పద్మకు పాము కాటు వేసిన మాట వాస్తవమేనని, ప్రస్తుతం ఆమె క్షేమంగా ఉన్నారని తెలిపారు.