సైబరాబాద్ పోలీసుల ఆధ్వర్యంలో ఘనంగా జాతీయ ఐక్యతా దినోత్సవం

                                       సర్దార్ వల్లభభాయ్ పటేల్ 151 వ జయంతి సందర్భంగా జాతీయ ఐక్యతా ప్రతిజ్ఞ
గచ్చిబౌలి,మేజర్ న్యూస్ : సర్దార్ వల్లభభాయ్ పటేల్ 151వ జయంతిని పురస్కరించుకుని సైబరాబాద్ పోలీసుల ఆధ్వర్యంలో జాతీయ ఐక్యతా దినోత్సవం (రాష్ట్రీయ ఏక్తా దివస్) ఘనంగా నిర్వహించారు. ఈ సందర్భంగా సైబరాబాద్ అడ్మిన్ డీసీపీ అన్నపూర్ణ, ఐపీఎస్, పోలీసు అధికారులు, సిబ్బందితో జాతీయ ఐక్యతా ప్రతిజ్ఞ చేయించారు.ఈ సందర్భంగా అడ్మిన్ డీసీపీ అన్నపూర్ణ మాట్లాడుతూ భారత స్వాతంత్ర్య పోరాటంలో, దేశ సమగ్రతను కాపాడటంలో సర్దార్ వల్లభభాయ్ పటేల్ అందించిన సేవలు చిరస్మరణీయమని కొనియాడారు. దేశంలోని 562 సంస్థానాలను భారత యూనియన్‌లో విలీనం చేయడంలో పటేల్ కీలక పాత్ర పోషించారని, తద్వారా ఐక్యమైన, బలమైన భారతదేశ నిర్మాణానికి పునాది వేశారని పేర్కొన్నారు.సర్దార్ వల్లభభాయ్ పటేల్ ఆదర్శ నాయకత్వం, అంకితభావం, జాతీయ ఐక్యత, సమగ్రత పట్ల ఆయన చూపిన నిబద్ధత తరతరాలకు స్ఫూర్తినిస్తూనే ఉంటాయని తెలిపారు. పోలీసు అధికారులు, సిబ్బంది విధుల నిర్వహణలో ఐక్యత, సమగ్రత, దేశసేవ అనే విలువలకు కట్టుబడి పనిచేయాలని, జాతీయ సమైక్యత, సామరస్యాన్ని మరింత బలోపేతం చేయాలని పిలుపునిచ్చారు.ఈ కార్యక్రమంలో హెడ్‌క్వార్టర్స్ డీసీపీ సంజీవ్, సూపరింటెండెంట్లు మల్లికార్జున్, యజ్దానీ, హనుమా, రమాదేవి, ఎస్టేట్ ఆఫీసర్ ఆర్‌ఐ హిమాకర్, అడ్మిన్ ఆర్‌ఐ రామారావు, వెల్ఫేర్ ఆర్‌ఐ నాగరాజుతో పాటు పలువురు పోలీసు ఉన్నతాధికారులు, సిబ్బంది పాల్గొన్నారు.