రాజేంద్రనగర్ ఔటర్ రింగ్ రోడ్డుపై ఘోర ప్రమాదం

రాజేంద్రనగర్: ఔటర్ రింగ్ రోడ్డుపై ఘోర రహదారి ప్రమాదం చోటుచేసుకుంది. హిమాయత్ సాగర్ సమీపంలో ముందు వెళ్తున్న ట్రక్‌ను ఒక గూడ్స్ ఆటో వేగంగా ఢీకొట్టిన ఘటనలో ఇద్దరు అక్కడికక్కడే మృతి చెందగా, మరో 15 మంది తీవ్రంగా గాయపడ్డారు.

పోలీసులు తెలిపిన వివరాల ప్రకారం... ముచ్చింతల్ ప్రాంతంలో ఒక భవనానికి పెయింటింగ్ పనులు పూర్తి చేసుకుని తిరిగి వస్తున్న క్రమంలో ఈ ప్రమాదం జరిగింది. ప్రమాద సమయంలో ఆటోలో మొత్తం 17 మంది ఉన్నట్లు సమాచారం. హిమాయత్ సాగర్ ఔటర్ రింగ్ రోడ్డు వద్దకు రాగానే, నిద్రమత్తులోకి జారుకున్న ఆటో డ్రైవర్ ముందర వెళ్తున్న ట్రక్‌ను బలంగా ఢీకొట్టాడు. ఈ ఘాతానికి ఆటో ముందు భాగం పూర్తిగా నుజ్జునుజ్జయింది.

ప్రమాదం జరిగిన వెంటనే ట్రక్ డ్రైవర్ వాహనాన్ని ఆపకుండా పారిపోగా, ఔటర్ రింగ్ రోడ్డు సిబ్బంది దాదాపు 20 కిలోమీటర్ల మేర ఛేజ్ చేసి లారీని పట్టుకున్నారు.

సమాచారం అందుకున్న స్థానిక రాజేంద్రనగర్ పోలీసులు వెంటనే ఘటనా స్థలానికి చేరుకుని సహాయక చర్యలు చేపట్టారు. క్షతగాత్రులను హుటాహుటిన సమీప ఆసుపత్రికి తరలించారు. గాయపడిన వారిలో 10 మంది పరిస్థితి అత్యంత విషమంగా ఉన్నట్లు వైద్యులు తెలిపారు. ఈ ఘటనపై కేసు నమోదు చేసిన రాజేంద్రనగర్ పోలీసులు దర్యాప్తు చేస్తున్నారు. పండుగ పూట ఈ ఘోర ప్రమాదం జరగడంతో బాధితుల కుటుంబాల్లో తీవ్ర విషాదం అలముకుంది.