ప్రతి ఇంటా ఉసిరి.. ప్రతి గుడిలో బిల్వం: ఎమ్మెల్యే చామకూర మల్లారెడ్డి
కీసరగుట్టలో ఉసిరి, బిల్వం మొక్కలు నాటిన మాజీ మంత్రి
కీసర, మేజర్ న్యూస్ (నవంబర్, 16): పర్యావరణ పరిరక్షణతో పాటు ఆధ్యాత్మిక ప్రాధాన్యం కలిగిన మొక్కలను పెంచడం ద్వారా ప్రకృతిని, సంప్రదాయాలను కాపాడుకోవచ్చని మాజీ మంత్రి, మేడ్చల్ ఎమ్మెల్యే చామకూర మల్లారెడ్డి అన్నారు. ప్రతి ఇంటా ఉసిరి, ప్రతి గుడిలో బిల్వం మొక్కలు ఉండాలనే లక్ష్యంతో చేపట్టిన కార్యక్రమం స్ఫూర్తిదాయకమని పేర్కొన్నారు. మాజీ రాజ్యసభ సభ్యుడు జోగినిపల్లి సంతోష్కుమార్ ప్రారంభించిన గ్రీన్ ఇండియా ఛాలెంజ్లో భాగంగా కార్తీక మాసం సందర్భంగా సోమవారం కీసరగుట్ట శ్రీ రామలింగేశ్వర స్వామిని దర్శించుకుని ప్రత్యేక పూజలు నిర్వహించారు. అనంతరం ఆలయ ప్రాంగణంలో ఉసిరి, ఏకబిల్వం మొక్కలను నాటారు.
ఈ సందర్భంగా మల్లారెడ్డి మాట్లాడుతూ.. జోగినిపల్లి సంతోష్కుమార్ చేపట్టిన గ్రీన్ ఇండియా ఛాలెంజ్ ద్వారా ఇప్పటికే కోట్లాది మొక్కలు నాటడం అభినందనీయమన్నారు. ‘సరికొత్త హరిత సంకల్పం’తో ప్రతి ఇంటా ఉసిరి, ప్రతి ఆలయంలో బిల్వం మొక్కలు నాటాలనే ఆలోచన గొప్పదని కొనియాడారు. పర్యావరణ పరిరక్షణే లక్ష్యంగా చేపట్టిన ఈ కార్యక్రమం మరింత విస్తరించి రాష్ట్రవ్యాప్తంగా కొనసాగాలని ఆకాంక్షించారు. ఇంత మంచి కార్యక్రమానికి శ్రీకారం చుట్టిన సంతోష్కుమార్కు శుభాకాంక్షలు తెలిపారు.
గ్రీన్ ఇండియా ఛాలెంజ్ రాష్ట్ర మహిళా అధ్యక్షురాలు నాయకపు మాధురి వెంకటేశ్, రాష్ట్ర కోఆర్డినేటర్ నూతికడి భోజనారాయణ ఆధ్వర్యంలో కార్యక్రమం నిర్వహించారు. ఇందులో ఆలయ చైర్మన్ తటాకం వెంకటేశ్శర్మ, ఈవో సుధాకర్రెడ్డి, భాను శర్మ, రమేశ్యాదవ్, గుర్రం శ్రీధర్రెడ్డి, మిట్టపల్లి అనిల్గౌడ్ తదితరులు పాల్గొన్నారు.