కనపర్తిలో మోటార్ వైర్ల చోరీలు..
సూర్య వీణవంక :కరీంనగర్ జిల్లా వీణవంక మండలం కనపర్తి గ్రామంలో మోటార్ వైర్ల చోరీలు జరుగుతుండటంతో రైతులు, గ్రామ ప్రజలు ఆందోళన వ్యక్తం చేస్తున్నారు. గత కొన్ని రోజులుగా వ్యవసాయ బావుల వద్ద రైతులు ఏర్పాటు చేసుకున్న మోటార్లకు సంబంధించిన వైర్లను గుర్తుతెలియని వ్యక్తులు చోరీ చేస్తున్నారని గ్రామస్తులు తెలిపారు.
గతంలో కూడా గ్రామ పరిధిలో మోటార్లు, వైర్లు చోరీకి గురైన సంఘటనలు ఉన్నాయని పేర్కొన్నారు. రాత్రి వేళల్లో వ్యవసాయ పొలాల వైపు వెళ్లేందుకు రైతులు భయపడుతున్నారని ఆవేదన వ్యక్తం చేశారు. వరుసగా జరుగుతున్న చోరీలపై పోలీసులు ప్రత్యేక దృష్టి సారించి, రాత్రి వేళల్లో గస్తీ పెంచాలని గ్రామ ప్రజలు కోరుతున్నారు. చోరీలకు పాల్పడుతున్న వ్యక్తులను గుర్తించి కఠిన చర్యలు తీసుకోవాలని విజ్ఞప్తి చేస్తున్నారు.