ప్రజా ఫిర్యాదుల పరిష్కారంలో నిర్లక్ష్యం వహించద్దు: జిల్లా ఎస్పీ శరత్ చంద్ర పవార్

మునుగోడు,మేజర్ న్యూస్:వార్షిక తనిఖీలో భాగంగా బుదవారం నల్గొండ జిల్లా ఎస్పీ శరత్ చంద్ర పవార్ మునుగోడు పోలీస్ స్టేషన్‌ను  సందర్శించి స్టేషన్ పనితీరు, సిబ్బంది విధుల నిర్వహణ, కేసుల దర్యాప్తు పురోగతిని సమీక్షించారు. పోలీస్ స్టేషన్‌కు చేరుకున్న ఎస్పీకి మునుగోడు స్టేషన్ సిబ్బంది గౌరవ వందనం సమర్పించారు. అనంతరం స్టేషన్ పరిసరాలు, రిసెప్షన్ కౌంటర్, రికార్డుల నిర్వహణ, సిబ్బంది విధుల వివరాలు, సీసీ కెమెరాల పనితీరును పరిశీలించి పోలీస్ స్టేషన్ నిర్వహణపై సంబంధిత అధికారులను అడిగి తెలుసుకున్నారు.
ఈ సందర్భంగా ఆయన మాట్లాడుతూ, పోలీస్ స్టేషన్‌కు వచ్చే ప్రతి ఫిర్యాదుదారుడికి న్యాయం జరుగుతుందనే నమ్మకం కల్పించేలా సిబ్బంది పనిచేయాలని సూచించారు. ప్రజలతో మర్యాదపూర్వకంగా వ్యవహరిస్తూ పోలీస్ శాఖ ప్రతిష్టను పెంపొందించాలని తెలిపారు. ప్రజలకు మెరుగైన సేవలు అందించడంలో ప్రతి పోలీస్ అధికారి బాధ్యతాయుతంగా వ్యవహరించాలని స్పష్టం చేశారు. నేరస్థులకు శిక్ష పడేలా పకడ్బందీగా దర్యాప్తు పూర్తి చేసి, నిర్ణీత గడువులో చార్జిషీట్లు దాఖలు చేయాలని ఆదేశించారు.శాంతి భద్రతలకు విఘాతం కలిగించే వ్యక్తులపై నిరంతర నిఘా ఉంచాలని, పాత నేరస్తులు, రౌడీషీటర్లు, అసాంఘిక కార్యకలాపాలకు పాల్పడే వారి కదలికలను పర్యవేక్షించాలని సూచించారు. రాత్రి వేళల్లో పెట్రోలింగ్‌ను పటిష్టం చేసి దొంగతనాలు, ఇతర నేరాలు జరగకుండా ముందస్తు చర్యలు చేపట్టాలని ఆదేశించారు.
గంజాయి, ఇతర మాదకద్రవ్యాలకు యువత బానిస కాకుండా గ్రామస్థాయిలో అవగాహన కార్యక్రమాలు నిర్వహించాలని సూచించారు. 
మహిళలు, బాలికల భద్రత విషయంలో ప్రత్యేక శ్రద్ధ వహించాలని, మహిళలపై నేరాలకు సంబంధించిన ఫిర్యాదులపై వెంటనే స్పందించి బాధితులకు అండగా నిలవాలని సూచించారు. పోలీస్ స్టేషన్‌లోని క్రైమ్ రికార్డులు, కేసు డైరీలు, జనరల్ డైరీ, ఎఫ్‌ఐఆర్ రిజిస్టర్లు, కోర్టు కేసుల వివరాలు, ఇతర ముఖ్యమైన రికార్డులను పరిశీలించి వాటిని ఎప్పటికప్పుడు నవీకరించాలని సూచించారు. ఈ వార్షిక తనిఖీలో జిల్లా ఎస్పీ వెంట నల్లగొండ చండూర్ సీఐ రాము, డీసీఆర్‌బీ సీఐ శ్రీను నాయక్, మునుగోడు ఎస్‌ఐ మొగుళ్ళ శోభన్ బాబు, ఇతర పోలీస్ అధికారులు, సిబ్బంది పాల్గొన్నారు.

కె. ఇంద్రసేనా రెడ్డి,మేజర్ న్యూస్, మునుగోడు,నల్గొండ జిల్లా