పూడూరు–కిష్టాపూర్ డివిజన్‌లో మౌలిక వసతుల సమస్యలు పరిష్కరించాలి: మాజీ కౌన్సిలర్ ఉమా నాగరాజ్
మేడ్చల్, మేజర్ న్యూస్ : పూడూరు–కిష్టాపూర్ డివిజన్ పరిధిలో ప్రజలు ఎదుర్కొంటున్న మౌలిక వసతుల సమస్యలను తక్షణమే పరిష్కరించాలని మాజీ కౌన్సిలర్ ఉమా నాగరాజ్ ముదిరాజ్ అధికారులను కోరారు. పట్టణంలో జనాభా, రద్దీ రోజురోజుకూ పెరుగుతున్నప్పటికీ ప్రజలకు అవసరమైన కనీస సౌకర్యాలు అందుబాటులో లేకపోవడంతో తీవ్ర ఇబ్బందులు ఎదురవుతున్నాయని తెలిపారు.ముఖ్యంగా మేడ్చల్ బస్ డిపో సమీపంలోని హైవే పక్కన, మేడ్చల్ చెక్‌పోస్ట్, పూడూరు, కిష్టాపూర్ ప్రాంతాల్లో ఆధునిక మోడల్ పబ్లిక్ టాయిలెట్లు నిర్మించాలని విజ్ఞప్తి చేశారు. చుట్టుపక్కల గ్రామాల నుంచి నిత్యం వందలాది మంది ప్రజలు వివిధ పనుల నిమిత్తం ఆయా ప్రాంతాలకు వస్తుంటారని, మరుగుదొడ్ల సౌకర్యం లేక మహిళలు, వృద్ధులు, ప్రయాణికులు తీవ్ర ఇబ్బందులు పడుతున్నారని పేర్కొన్నారు. పట్టణ విస్తరణకు అనుగుణంగా ప్రజల అవసరాలను గుర్తించి తగిన సంఖ్యలో పబ్లిక్ టాయిలెట్లు ఏర్పాటు చేయాలని కోరారు.అదేవిధంగా మేడ్చల్ ఎన్జీవోస్ కాలనీలో గత కొన్ని నెలలుగా కొనసాగుతున్న డ్రైనేజీ సమస్యను వెంటనే పరిష్కరించాలని, కాలనీలోని రెండు గల్లీల్లో నూతన సీసీ రోడ్లు నిర్మించాలని కోరారు. ఈ మేరకు సీఎంసీ డిప్యూటీ కమిషనర్ సుధాంష్‌ను కలిసి సమస్యలను వివరించి వినతిపత్రం అందజేశారు.ప్రజా సమస్యల పరిష్కారం కోసం అధికారులను కలిసి వినతిపత్రం అందజేయడంపై స్థానికులు హర్షం వ్యక్తం చేస్తున్నారు. పదవిలో ఉన్నా లేకున్నా ప్రజా సమస్యలపై స్పందిస్తూ వాటి పరిష్కారానికి కృషి చేయడం అభినందనీయమని పలువురు పేర్కొన్నారు.ఈ కార్యక్రమంలో బీఆర్ఎస్ పార్టీ నాయకులు కమ్రుద్దీన్, మాజీ టౌన్ యూత్ ప్రెసిడెంట్ నాగరాజ్ ముదిరాజ్ పాల్గొన్నారు.
