పంట నష్టాన్ని అంచనా వేసి గుండాల రైతులకు న్యాయం చేయాలి

సూర్య తిర్యాణి : వరి పంట చేతికొచ్చే సమయంలో సాగునీరు అందక పంట దెబ్బతింటోందని, ప్రభుత్వం తమకు న్యాయం చేయాలని గుండాల రైతులు కోరుతున్నారు. కొమురం భీం ఆసిఫాబాద్ జిల్లా తిర్యాణి మండలంలోని గుండాల గ్రామంలో మైసమ్మ చెరువు తూము నుంచి పొలాలకు నీరు రావడం లేదని రైతులు తెలిపారు. నెలల తరబడి కష్టపడి సాగు చేసిన పంట చివరి దశలో దెబ్బతినడంతో దిగుబడి తగ్గి, పెట్టిన పెట్టుబడి కూడా తిరిగి రాదేమోనని ఆవేదన వ్యక్తం చేశారు.మైసమ్మ చెరువు తూమును పరిశీలించి, పొలాలకు నీరు అందకపోవడానికి కారణాన్ని గుర్తించాలని రైతులు కోరారు. ఇంకా కాపాడగలిగే పంటకు వెంటనే సాగునీరు అందించేలా చర్యలు తీసుకోవాలని విజ్ఞప్తి చేశారు.అధికారులు దెబ్బతిన్న పొలాలను పరిశీలించి రైతులవారీగా పంట నష్టాన్ని నమోదు చేయాలని కోరారు. నష్టం వివరాలను ప్రభుత్వానికి నివేదించి, బాధిత రైతులకు సకాలంలో పరిహారం అందించి ఆదుకోవాలని విజ్ఞప్తి చేశారు