పట్టభద్రుల ఓటరు నమోదుపై బీఆర్ఎస్ ప్రత్యేక దృష్టి..

                                    నవంబర్ 6లోగా ప్రక్రియ పూర్తి చేయాలి: ఎమ్మెల్సీ నవీన్ రావు, ఎమ్మెల్యే వివేకానంద్

 కొంపల్లి మేజర్ న్యూస్  పట్టభద్రుల ఎమ్మెల్సీ ఎన్నికల ఓటరు నమోదు ప్రక్రియను మరింత వేగవంతం చేయాలని ఎమ్మెల్సీ నవీన్ రావు, బీఆర్ఎస్ శాసనసభాపక్ష విప్, కుత్బుల్లాపూర్ ఎమ్మెల్యే కేపీ వివేకానంద్ పార్టీ నాయకులు, బూత్ ఇంచార్జ్‌లకు సూచించారు. శనివారం పేట్ బషీరాబాద్‌లోని 132వ డివిజన్ ఎమ్మెల్యే క్యాంపు కార్యాలయంలో కుత్బుల్లాపూర్ నియోజకవర్గ పట్టభద్రుల ఎమ్మెల్సీ ఎన్నికల ఇంచార్జ్, ఎమ్మెల్సీ నవీన్ రావు, ఎమ్మెల్యే కేపీ వివేకానంద్‌తో కలిసి బీఆర్ఎస్ ముఖ్య నాయకులు, బూత్ ఇంచార్జ్‌లతో సమావేశం నిర్వహించారు. ఈ సందర్భంగా నియోజకవర్గంలో ఓటరు నమోదు పరిస్థితిని సమీక్షించి, అర్హులైన పట్టభద్రులందరికీ ఓటు హక్కు కల్పించేలా చేపట్టాల్సిన కార్యాచరణపై దిశానిర్దేశం చేశారు. ఈ సందర్భంగా వారు మాట్లాడుతూ ముందుగా ప్రతి ఒక్కరూ తమ పట్టభద్రుల ఓటును నమోదు చేసుకోవడంతో పాటు తమ కుటుంబ సభ్యులు, బంధువులు, స్నేహితులు, పరిచయస్తులు, కాలనీల్లోని అర్హులైన పట్టభద్రులను గుర్తించి ఓటరుగా నమోదు చేయించాలని సూచించారు. నవంబర్ 6వ తేదీతో ఓటరు నమోదు గడువు ముగియనున్న నేపథ్యంలో సమయం తక్కువగా ఉందని, పార్టీ నాయకులు, కార్యకర్తలు, అనుబంధ సంఘాల ప్రతినిధులు క్షేత్రస్థాయిలో విస్తృతంగా పర్యటించాలని పిలుపునిచ్చారు. సమన్వయంతో పనిచేస్తూ అర్హులైన ప్రతి పట్టభద్రుడి ఓటు నమోదు జరిగేలా ప్రత్యేక శ్రద్ధ తీసుకోవాలని తెలిపారు. ఈ సమావేశంలో సీఎంసీ పరిధిలోని 8 డివిజన్లతో పాటు కొంపల్లి, నిజాంపేట్, దుండిగల్ సర్కిళ్లకు చెందిన మాజీ ప్రజాప్రతినిధులు, పార్టీ అధ్యక్షులు, సీనియర్ నాయకులు, బూత్ ఇంచార్జ్‌లు, కార్యకర్తలు తదితరులు పాల్గొన్నారు.