పరదాల చాటున గిరిజన విద్యార్థుల చదువు కష్టాలు

సూర్య తిర్యాణి : చుట్టూ ఆకుపచ్చ పరదాలు, కింద మట్టి నేల, చాపపై పుస్తకాల సంచులు. ఎదురుగా ఉపాధ్యాయుడు, ఆయన ముందు నిల్చున్న విద్యార్థులు. ఇదీ తిర్యాణి మండలం గోపేర గ్రామపంచాయతీ పరిధిలోని పునగూడ గిరిజన సంక్షేమ ప్రాథమిక పాఠశాల (టీడబ్ల్యూపీఎస్‌) పరిస్థితి. పాఠశాలకు సొంత భవనం లేకపోవడంతో పరదాలు కట్టిన తాత్కాలిక వసతిలోనే తరగతులు నిర్వహిస్తున్నారు.తరగతి గదులు లేకపోవడంతో పిల్లలు చదువుకోవడానికి, ఉపాధ్యాయులు పాఠాలు చెప్పడానికి ఇబ్బందులు పడుతున్నారని గ్రామస్తులు తెలిపారు. ఈ పరిస్థితిని సంబంధిత అధికారుల దృష్టికి తీసుకెళ్లినా ఇప్పటివరకు సమస్య పరిష్కారం కాలేదని ఆవేదన వ్యక్తం చేశారు. పిల్లలు రోజూ బడికి వస్తున్నా, కూర్చొని చదువుకోవడానికి సరైన గది లేకపోవడం బాధ కలిగిస్తోందని పేర్కొన్నారు. 

ఉన్నతాధికారులు పునగూడకు వచ్చి తరగతులు నిర్వహిస్తున్న ప్రదేశాన్ని పరిశీలించాలని గ్రామస్తులు కోరారు. విద్యార్థులు సౌకర్యంగా కూర్చొని చదువుకునేందుకు అవసరమైన తరగతి గదులతో పాఠశాల భవనాన్ని నిర్మించాలని విజ్ఞప్తి చేశారు.