నేడు సచివాలయంలో మంత్రులతో కీలక భేటీ

హైదరాబాద్, సూర్య ప్రతినిధి :రాష్ట్రంలో నెలకొన్న వర్షాభావ పరిస్థితులు, ఎల్‌నినో ప్రభావం మరియు భానుడి ప్రతాపంతో ఉత్పన్నమయ్యే సవాళ్లపై చర్చించేందుకు ముఖ్యమంత్రి ఎనుముల రేవంత్ రెడ్డి సచివాలయంలో మంత్రులతో సమావేశం కానున్నారు. సాయంత్రం 5 గంటలకు జరగనున్న ఈ కీలక భేటీలో రాష్ట్రవ్యాప్తంగా తాగు, సాగునీటి ఎద్దడి తలెత్తకుండా తీసుకోవాల్సిన చర్యలపై సుదీర్ఘంగా చర్చించనున్నారు.

ఈ సమావేశంలో ప్రధానంగా ఎల్‌నినో ప్రభావం వల్ల రాబోయే ఎనిమిది నెలల పాటు ఎదురయ్యే విద్యుత్, నీటి కొరత ముప్పును తట్టుకునేందుకు సమగ్ర కార్యాచరణ ప్రణాళికను (Action Plan) రూపొందించనున్నారు. ముఖ్యంగా పంటల రక్షణ కోసం రైతులకు నిరంతరాయంగా సాగునీరు, విద్యుత్ అందించడం, పట్టణాలు, గ్రామాల్లో తాగునీటి ఎద్దడి తలెత్తకుండా ముందస్తు ఏర్పాట్లు చేయడంపై దృష్టి సారించనున్నారు. కరవు ప్రభావం తీవ్రంగా ఉన్న ప్రాంతాల్లో ప్రజా ప్రతినిధులు, అధికారులను భాగస్వాములను చేస్తూ గ్రామీణ స్థాయి నుంచి అవగాహన కార్యక్రమాలు నిర్వహించడం, వార్ రూమ్‌లు ఏర్పాటు చేయడంపై మంత్రులకు సీఎం దిశానిర్దేశం చేయనున్నారు.