అంజన్నకు సీఎం ప్రత్యేక పూజలు

నాగర్‌కర్నూల్, సూర్య ప్రతినిధి :పవిత్ర విజయదశమి పండుగను పురస్కరించుకుని తెలంగాణ ముఖ్యమంత్రి శ్రీ ఎ. రేవంత్ రెడ్డి గారు కుటుంబ సమేతంగా తన స్వగ్రామమైన నాగర్‌కర్నూల్ జిల్లా వంగూరు మండలం కొండారెడ్డిపల్లిని సందర్శించారు. ఈ సందర్భంగా గ్రామంలోని శ్రీ ఆంజనేయ స్వామి వారిని దర్శించుకుని కుటుంబ సమేతంగా ప్రత్యేక పూజలు నిర్వహించారు. అనంతరం వేద పండితులు, అర్చకుల నుంచి ఆశీర్వచనాలు స్వీకరించారు.

ముందుగా స్వగ్రామానికి చేరుకున్న ముఖ్యమంత్రికి ప్రజాప్రతినిధులు, ఉన్నతాధికారులు, గ్రామస్థులు పెద్దఎత్తున తరలివచ్చి ఘన స్వాగతం పలికారు. అనంతరం గ్రామంలో భారీ ర్యాలీగా బయలుదేరి శ్రీ ఆంజనేయస్వామి వారి ఆలయానికి చేరుకున్నారు. ఈ కార్యక్రమంలో ఎంపీ మల్లు రవితో పాటు ఉమ్మడి జిల్లాకు చెందిన ఎమ్మెల్సీలు, ఎమ్మెల్యేలు, స్థానిక ప్రజాప్రతినిధులు మరియు పెద్ద సంఖ్యలో ప్రజలు పాల్గొన్నారు.