నాయకపుగూడ పాఠశాలలో ఘనంగా బాలల దినోత్సవం

సూర్య తిర్యాణి : తిర్యాణి మండలం నాయకపుగూడ గ్రామపంచాయతీ పరిధిలోని గిరిజన సంక్షేమ ప్రాథమిక పాఠశాల (టీడబ్ల్యూపీఎస్‌)లో శనివారం బాలల దినోత్సవ వేడుకలు ఘనంగా నిర్వహించారు. విద్యార్థుల ఆనందోత్సాహాలతో పాఠశాలలో సందడి నెలకొంది. కార్యక్రమానికి సర్పంచ్ ఎదుల సుమలత, ఉపసర్పంచ్ పవన్ నంద ముఖ్య అతిథులుగా హాజరై విద్యార్థులకు బాలల దినోత్సవ శుభాకాంక్షలు తెలిపారు.ఈ సందర్భంగా సర్పంచ్ ఎదుల సుమలత మాట్లాడుతూ, పిల్లలే దేశ భవిష్యత్తు అని అన్నారు. విద్యార్థులు చిన్ననాటి నుంచే క్రమశిక్షణను అలవర్చుకుని, చదువుపై శ్రద్ధ పెట్టాలని సూచించారు. ప్రతి విద్యార్థి ఉన్నత లక్ష్యాలను నిర్దేశించుకుని, వాటిని సాధించేందుకు పట్టుదలతో చదవాలని ఆకాంక్షించారు. విద్యార్థులు చదువులో రాణించి జీవితంలో ఉన్నత స్థాయికి చేరుకోవాలని అభిలషించారు.పాఠశాల ఉపాధ్యాయుడు, గ్రామపంచాయతీ ప్రతినిధులు, అంగన్‌వాడీ టీచర్లు విద్యార్థులతో కలిసి వేడుకల్లో పాల్గొన్నారు. చిన్నారుల ఉత్సాహం మధ్య కార్యక్రమం ఆహ్లాదకరంగా సాగింది. ఈ కార్యక్రమంలో ఉపాధ్యాయుడు నైతం దశ్వంత్రావు, వార్డు సభ్యురాలు విమల, అంగన్‌వాడీ టీచర్లు ప్రేమల, మమత, ఎదుల శ్రీనివాస్, మెండ్రపు హరీష్ తదితరులు పాల్గొన్నారు.