ముదిరాజులకు కాంగ్రెస్ ప్రభుత్వం ఇచ్చిన హామీలను నెరవేర్చాలి........
మద్దూర్ …ముదిరాజుల హక్కులపై కాంగ్రెస్ ప్రభుత్వానికి చిత్తశుద్ధి లేదని, కాంగ్రెస్ ప్రభుత్వం ముదిరాజులకు ఇచ్చిన హామీలను నెరవేర్చాలని ముదిరాజ్ మహాసభ సిద్దిపేట జిల్లా ప్రధాన కార్యదర్శి చొప్పరి సాగర్ ముదిరాజ్ అన్నారు. శనివారం ప్రపంచ మత్స్య కార్మికుల దినోత్సవం సందర్భంగా తెలంగాణ ముదిరాజ్ మహాసభ 12వ వార్షికోత్సవాన్ని పురస్కరించుకొని జెండా ఆవిష్కరణ కార్యక్రమాన్ని నిర్వహించారు. ఈ సందర్భంగా వారు మాట్లాడుతూ ముదిరాజులను బీసీ డీ నుండి బీసీ ఏలోకి మారుస్తానని కాంగ్రెస్ ప్రభుత్వం ఇచ్చిన హామీని ఇప్పటివరకు నెరవేర్చలేదన్నారు. ముదిరాజుల హక్కులు సాధించేవరకు ఐక్యంగా ఉద్యమించాలన్నారు. ఇతర వృత్తి సంఘాల కార్మికులకు ప్రభుత్వం వివిధ సంక్షేమ పథకాలు పెన్షన్లు అందిస్తున్నప్పటికీ మత్స్యకారులకు ప్రాధాన్యత ఇవ్వడం లేదని ఆవేదన వ్యక్తం చేశారు. మత్స్యకారుల కుటుంబాలకు అన్ని రకాల సంక్షేమ పథకాలు పెన్షన్లు తక్షణమే మంజూరు చేయాలని రాష్ట్ర ప్రభుత్వాన్ని డిమాండ్ చేశారు. ముదిరాజులకు ఇచ్చిన హామీలు నెరవేర్చే వరకు దశలవారీగా పోరాటాలు నిర్వహిస్తామని హెచ్చరించారు. ఈ కార్యక్రమంలో ముదిరాజ్ అధ్యక్షులు సంఘం నాయకులు కుల సభ్యులు తదితరులు పాల్గొన్నారు.